“Ҳаёт-мамот ўйинлари”даги Сноу образини гавдалантирган канадалик актёр Дональд Сазерленд вафот этди

Канадалик кино ва театр актёри, кинопродюсер Дональд Сазерленд узоқ давом этган хасталикдан сўнг 88 ёшида Майамида вафот этди.

Дональд Сазерленд 1935 йилда Канадада таваллуд топган. Кинодаги фаолиятини 1960 йилларда Британия телесериаллари, жумладан, “Қасоскорлар” лойиҳаси билан бошлаган. У ўз фаолияти давомида 150 дан ортиқ фильмда, жумладан, “Ҳарбий дала госпитали” комедияси, “Клют” триллери, “Оддий одамлар”, “Манфаатли таклиф” ҳамда “Ғурур ва андиша” фильмларида суратга тушган ва Америка киноакадемиясининг фахрли “Оскар” мукофоти лауреати бўлган.

Сазерленд 1967 йилда Голливудга кўчиб келган. У “Ҳаёт-мамот” франшизасида ёвуз президент Сноу образини гавдалантирган. Кино саноатидаги фаолияти давомида актёр “Эмми”, “Олтин глобус” каби фахрий мукофотларни ҳам қўлга киритган.

Дональд Сазерленд ўлими муносабати билан марҳумнинг ўғли Кифер Сазерленд, Хелен Миррен, режиссёр Рон Ховар ва Том Блит ва бошқалар ўз ҳамдардлигини билдирди.