Франциялик аёл 20 йил давомида ишламаса ҳам ойлик маош берган компанияни судга берди

Франциялик аёл алоқа хизматларини кўрсатувчи дунёдаги энг йирик телекоммуникация операторларидан бири бўлган Orange компаниясини судга берди. У аввал шу корхонада узоқ вақт давомида ишлаган. Даъвогарнинг сўзларига кўра, собиқ иш берувчи аёлга 20 йил давомида ҳеч қандай топшириқ бермасдан ойлик маош тўлаган. Айбловчи буни ўзига нисбатан психологик тазйиқ ва камситиш деб атамоқда.

Лоуренс Ван Вассенхов 1993 йилда кадрлар бўлими котибаси сифатида ишга олинган. Иш берувчи компания аёлнинг гепимплегия (тананинг бир қисми шол бўлиши) ва эпилепсия (тутқаноқ) билан касалланганидан хабардор эди. Шунинг учун унинг жисмоний ҳолатига мос бўлган енгил лавозимни таклиф қилди.

Бир неча йил ўтгач, Ван Вассенхов Франциянинг бошқа шаҳридаги филиалга иш жойини кўчирилишини сўради. Бироқ янги офис аёлнинг умумий соғлиғи ва эҳтиёжларига мослаштирилмаган эди. Бу факт шифокорлар томонидан ҳам тасдиқланди. Аёл саккиз соат давомида компьютерда ўтиришга тўғри келган, бундай режим ногирон киши учун мумкин эмас. Шу туфайли Orange компанияси имконияти чекланган аёлга ҳеч қандай топшириқ бермасдан кейинги 20 йил давомида тўлиқ маош билан таъминлаб келишни қарор қилган.

Ван Вассенхов адвокатларининг сўзларига кўра, компания шундай ҳийла йўл билан уни ишдан бўшатишга мажбурламоқчи бўлган:

Ногирон инсонлар ҳам жамиятнинг бир бўлаги сифатида меҳнат қилиш, ўз ўрнига эга бўлиш ва ижтимоий алоқалар яратиши лозим. Бу ҳолатда эса Лоуренс Ван Вассенховга бундай имкониятлар берилмади. Унга ҳам барчадек иш ва топшириқ бериш ўрнига шунчаки ойлик тўлаб келинди. Фикримизча, компания аёлнинг ишдан ўз хоҳиши билан кетишини кутган, — деди Лоуренснинг адвокати.

Шу сабабли Ван Вассенхов унга иш беришни талаб қилиб судга мурожаат қилди. Компания вакилларининг таъкидлашича, улар ходимнинг ижтимоий мавқейини ҳисобга олган ва доимий равишда унинг иш ҳақини тўлиқ ва ўз вақтида берган. Бундан ташқари, Вассенхов иш берувчидан бир қатор имтиёзли ёрдам пули олган ва мунтазам равишда касаллик таътилида бўлган.

Аёл эса Orange компаниясидан 700 минг АҚШ доллари товон пули талаб қилмоқда.