So‘nggi ikki yil davomida Rossiya Federatsiyasi hududida Qirg‘izistondan kelgan muhojirlar soni 49 foizga kamaygan. Bu haqda Qirg‘iziston Tashqi ishlar vazirligi huzuridagi Konsullik departamenti bergan bayonotga asoslanib, “AKIpress” nashri xabar berdi.
Qirg‘iziston Tashqi ishlar vazirligi Konsullik departamenti direktori o‘rinbosari Baqit Qodirov “Birinchi radio” telekanali efirida maxsus bayonot eʼlon qilib, Rossiyada qirg‘iz migrantlari soni qisqarishi haqidagi xabarni tasdiqlagan. Bayonotga ko‘ra, hozirda Rossiyada 411 mingga yaqin Qirg‘iziston mehnat muhojirlari ishlamoqda.
Manbada aytilishicha, 2022-yilda Rossiyada 836 mingdan ortiq qirg‘iz migrantlari ishlagan. 2023-yilda esa ularning soni 651 minggacha qisqargan.
Mehnat, aholini ijtimoiy muhofaza qilish va migratsiya vazirligi huzuridagi migratsiya siyosati bosh boshqarmasi boshlig‘i Erkin Karimov muhojirlarning o‘z vataniga qaytishiga sababchi bo‘layotgan omillarni sanab o‘tgan. Unga ko‘ra dunyodagi beqaror geosiyosiy vaziyat va qoniqarsiz ish haqi fuqarolarni ortga qaytishga majbur qilmoqda.
Maʼlumot o‘rnida, O‘zbekiston prezidenti idorasi matbuot kotibi Sherzod Asadov oldinroq “Sevimli” telekanali jurnalistiga bergan intervyusida Rossiyadagi o‘zbek mehnat muhojirlari hozirda 1 million nafarni tashkil etishi haqida xabar qilgan edi. Rossiya prezidenti Vladimir Putinning Toshkentga tashrifi paytida ham Moskvadagi hukumat rahbari maʼlumotni tasdiqlagan.
Statistik maʼlumotlar 2016-yilgacha Rossiya hududida 4 million atrofida o‘zbek mehnat muhojirlari faoliyat yuritganini ko‘rsatgan. Ayrim norasmiy manbalar muhojirlar sonini 2016-yil uchun hattoki 6 million atrofida deb belgilagan.
“Mana shu ko‘rsatkichning o‘zi ham mamlakatimizda amalga oshirilayotgan iqtisodiy islohotlar samarasini ko‘rsatadi, deb bilaman”, — degan Sherzod Asadov.
Izoh (0)