Канадалик таниқли хонанда Селин Дионнинг аҳволи хасталик сабаб оғирлашгани айтилди

Канадалик машҳур хонанда Селин Дионда кам учрайдиган неврологик касаллик аниқланган эди. Маълум бўлишича, яқинда хонанданинг аҳволи ёмонлашган. Бу ҳақда унинг опаси Клодетт Дион маълум қилмоқда.

Селин Дион шу йилнинг ноябрь ойида Кэти Перрининг концертида қатнашиб, мухлисларга тез орада саҳнага қайтишга умид берган эди.

Опасининг таъкидлашича, Дион хасталик туфайли танасини назорат қила олмаяпти, яқинлари эса оғриқни енгиллаштиришга ёрдам бера олмаяпти.

“У кўп ҳаракат қилишига ва интизомига қарамай, танасидаги назоратни йўқотгани мени қаттиқ ташвишга солди”, — дейди Клодетт Дион.

Унинг қўшимча қилишича, Селиннинг ташхиси кам ўрганилган ва ҳозиргача хонандага ёрдам берадиган дори топилмаган, лекин қўшиқчининг қариндошлари умидларини йўқотмаганини, Дионнинг ўзи эса саҳнага қайтишни орзу қилишини айтди.

Маълумот учун, бир йил муқаддам хонанда хасталик белгилари бошлангани туфайли Европа бўйлаб гастрол концертларини бекор қилган эди.