“Мукофот муносиб эгасига берилди” — Азамат Зиё Ўзбекистон президенти Туркия олий нишони билан тақдирлангани ҳақида

Академик Азамат Зиё президент Шавкат Мирзиёевга Туркия олий мукофотининг берилиши адолатли қарор бўлганини айтди. Тарихчининг фикрича, давлат раҳбари ўз фаолияти давомида Туркия ва Ўзбекистон ўртасидаги дўстона муносабатларни ривожлантиришга катта ҳисса қўшмоқда.

Президент Шавкат Мирзиёев жорий йилнинг 5–7 июнь кунлари Туркияга ташрифи чоғида “Туркия Республикаси нишони” билан тақдирланди. Мазкур олий мукофот мамлакат президенти қарорига мувофиқ, Туркия билан дўстона муносабатларни ривожлантиришга катта ҳисса қўшган давлат арбобларига берилади.

Фанлар академияси Тарих институти директори Азамат Зиё “Ўзбекистон 24” телеканалига берган интервьюсида Ўзбекистон президентининг бундай олий мукофотга сазовор бўлиши қувонарли ҳол эканини айтди.

“Мен буни ҳам табиий, ҳам адолатли деб биламан. Гап бу ерда фақатгина Ўзбекистон–Туркия муносабатлари ҳақида эмас. Масала жуда чуқур. Бу ерда Шавкат Миромоновични туркий дунёни бирлаштириш билан боғлиқ бўлган хизматлари ётибди. 150 йил туркий дунё ишламади. Нега ишламади? Чунки унда Ўзбекистон, ўзбек миллати йўқ эди. Туркий дунё юраги, ақл-заковати, маркази бу Турон, Туркистон, Ўзбекистон. Ҳамма гап мана шу юрак ва ақлнинг қандай ишлаши, ўзини қандай тутишида. Сўнги 33 йиллик тарихимиз буни яққол кўрсатди. Биз ўзимизнинг табиий қўрғонимиз, муҳитимиздан анча йироқлашиб кетдик. Аммо 2016 йил кузидан ўзбек жамиятида вазият тубдан ўзгарди. Буни бир сўз билан Янги Ўзбекистон, янгиланишлар дедик. Бунинг ортидан Марказий Осиёда, Турон, Туркистонда вазият ўзгарди. Кейин бу туркий дунёга кўчиши табиий эди. Яъни ўзбек давлати, миллати ўзининг ўрнига қайтди. Ўзининг тарихий вазифасини бажаришга қайтди. Бу ишларнинг бари табиий равишда Шавкат Мирзиёев номи билан, у кишининг сиёсати билан боғлиқ”, — деди сенатор.

Азамат Зиёнинг айтишича, сўнги 2000 йилликнинг камида учдан икки қисмида дунёни туркий кучлар бошқарган.

“Бу туркий кучлар, сулолалар Турондан, Туркистондан чиққан. Лекин уларнинг барчасига туркий дунёни бирлаштириш насиб қилмаган. Фақат Амир Темургина туркий дунёни бирлаштирган буюк инсон ҳисобланади. Бунга у киши 32 йил сарфлади. Аммо 2018 йилда Ўзбекистон туркий кенгашга аъзо бўлди. Шундан кейингина Туркий давлатлар кенгаши деган тушунча пайдо бўлди. Ўзбекистонсиз бу давлатлар кенгаши бўлиши мумкин эмас эди. Бунга ҳамманинг ҳам юраги дов бера олмасди. Бунинг юкини тортиш осон эмас. Ва у Туркий давлатлар кенгашига айланди. Биз бугун 2024 йилда туриб туркий дунё бирлашди дея оламизми? Албатта, дея оламиз. Ва бу жараёнга Шавкат Миромонович 7 йилда эришди. Мен ўйлайманки, бу у кишининг буюк, тарихий хизмати. Бу мукофот ўзининг муносиб эгасини топди”, — деди тарихчи.

Аввалроқ қардош мамлакатнинг олий давлат мукофотини Ўзбекистон етакчисига Туркия президенти Ражаб Тоййиб Эрдўғон тантанали равишда топширгани хабар қилинганди. Шу билан бирга, Шавкат Мирзиёев бошчилигидаги Ўзбекистон делегациясининг Туркияга ташрифи чоғида кўплаб икки томонлама келишувларга эришилгани билдирилган.