Anqara shahriga tashrif doirasida Shavkat Mirziyoyevni “Turkiya Respublikasi nishoni” bilan taqdirlash marosimi bo‘lib o‘tdi. Bu haqda Prezident matbuot xizmati xabar berdi.
Qardosh mamlakatning oliy davlat mukofotini O‘zbekiston yetakchisiga Turkiya prezidenti Rajab Toyyib Erdo‘g‘on tantanali ravishda topshirdi.
Bugun, mamlakatlarimiz o‘rtasidagi keng qamrovli strategik sheriklikni chuqurlashtirish to‘g‘risidagi deklaratsiya imzolangan kunda Turkiya Respublikasining bunday yuksak mukofotini olish men uchun katta sharafdir. Ushbu mukofot xalqlarimiz o‘rtasidagi ko‘p asrlik do‘stlik rishtalari, oliy darajadagi ishonchli muloqot hamda ikki tomonlama ko‘p qirrali munosabatlarning jadal rivojlanishining ramzidir, — dedi Shavkat Mirziyoyev.
Turkiya prezidentining qaroriga muvofiq mazkur oliy mukofot Turkiya bilan do‘stona munosabatlarni rivojlantirishga katta hissa qo‘shgan davlat arboblariga beriladi.
Avvalroq O‘zbekiston va Turkiya hukumatlari oldiga o‘zaro tovar ayirboshlashni 5 mlrd dollarga yetkazish vazifasi qo‘yilgani, Shavkat Mirziyoyev va Turkiya prezidenti Rajab Toyyib Erdo‘g‘on raisligida O‘zbekiston—Turkiya oliy darajadagi Strategik hamkorlik kengashining uchinchi yig‘ilishi bo‘lib o‘tgani to‘g‘risida xabar berilgandi.
Izoh (0)