Анқара шаҳрига ташриф доирасида Шавкат Мирзиёевни “Туркия Республикаси нишони” билан тақдирлаш маросими бўлиб ўтди. Бу ҳақда Президент матбуот хизмати хабар берди.
Қардош мамлакатнинг олий давлат мукофотини Ўзбекистон етакчисига Туркия президенти Ражаб Тоййиб Эрдўғон тантанали равишда топширди.
Бугун, мамлакатларимиз ўртасидаги кенг қамровли стратегик шерикликни чуқурлаштириш тўғрисидаги декларация имзоланган кунда Туркия Республикасининг бундай юксак мукофотини олиш мен учун катта шарафдир. Ушбу мукофот халқларимиз ўртасидаги кўп асрлик дўстлик ришталари, олий даражадаги ишончли мулоқот ҳамда икки томонлама кўп қиррали муносабатларнинг жадал ривожланишининг рамзидир, — деди Шавкат Мирзиёев.
Туркия президентининг қарорига мувофиқ мазкур олий мукофот Туркия билан дўстона муносабатларни ривожлантиришга катта ҳисса қўшган давлат арбобларига берилади.
Аввалроқ Ўзбекистон ва Туркия ҳукуматлари олдига ўзаро товар айирбошлашни 5 млрд долларга етказиш вазифаси қўйилгани, Шавкат Мирзиёев ва Туркия президенти Ражаб Тоййиб Эрдўғон раислигида Ўзбекистон—Туркия олий даражадаги Стратегик ҳамкорлик кенгашининг учинчи йиғилиши бўлиб ўтгани тўғрисида хабар берилганди.
Изоҳ (0)