Қозоғистон энергетика вазири Алмасадам Саткалиев Туркманистоннинг электр энергияси ва газ етказиб бериш таклифига муносабат билдирди. Бу ҳақда Tengrinews хабар берди.
“Биз Марказий Осиё давлатларидан келган барча ҳамкасбларимиз билан энергия ресурсларини ўзаро алмашиш ва етказиб бериш бўйича мунтазам маслаҳатлашувлар олиб борамиз. Умуман олганда, Туркманистон электр энергиясини етказиб бериш имкониятига эга. Қирғизистонга экспорт ҳозирданоқ йўлга қўйилган.
Биз ўз эҳтиёжларимиз ва таъмирлаш жадвалимиздан келиб чиқиб ҳаракат қиламиз. Умуман олганда, биз истеъмолчиларимиз учун тижорий манфаатдан келиб чиқиб, туркманистонлик ҳамкасбларимизнинг ҳам газ, ҳам электр энергияси бўйича таклифларини кўриб чиқишга тайёрмиз”, — деди Алмасадам Саткалиев ҳукумат мажлисида.
Қозоғистонда бу йил куз-қиш даврида электр энергияси тақчиллиги тахминан 1,025 гигаваттни ташкил қилади. Камомадни Россиядан қоплаш режалаштирилмоқда. Журналистлар вазирдан Қозоғистон қулай таклиф бўлса, Туркманистонга устунлик бериши мумкинми, деб сўрашган.
“Бу келишувларга боғлиқ. Ҳа, ҳақиқатан ҳам, агар таклиф қизиқарли бўлса, қозоғистонлик истеъмолчилар манфаатларини ҳимоя қилиш мақсадида биз бу таклифни қабул қилишга тайёрмиз”, — дея хулоса қилди Алмасадам Саткалиэв.
14 март куни Туркманистон миллий етакчиси, Халқ маслаҳати раиси Гурбангули Бердимуҳамедов Туркманистон Қозоғистонга табиий газ ва электр энергиясини экспорт қилиши мумкинлигини айтганди.
Изоҳ (0)