O‘zbekistonda fiskal huquqbuzarliklar sodir etganlik uchun qo‘llaniladigan moliyaviy sanksiyalar miqdori kamaytirildi. Bu boradagi tegishli qonun bilan Soliq kodeksiga o‘zgartirish kiritildi, deb xabar beradi Telegram’dagi “Huquqiy axborot” kanali.
Unga ko‘ra, fiskal belgilarni aks ettirish yoxud avtomatlashtirilgan hisobga olish o‘lchov vositalari bilan jihozlash yoki soliq organlarining axborot tizimlari bilan integratsiya qilinishini taʼminlash bo‘yicha qonunchilikda belgilangan talablarni yoki tartibni buzish, shuningdek, tovarlarni (mahsulotlarni) ishlab chiqaruvchilar, import qiluvchilar va sotuvchilar tomonidan identifikatsiya vositalari orqali majburiy raqamli markirovkalash qoidalarini buzish:
- realizatsiya amalga oshirilgan oxirgi hisobot choragida olingan sof tushumning 2 foizi miqdorida jarima solishga sabab bo‘lishi belgilandi.
Ilgari realizatsiya amalga oshirilgan oxirgi hisobot choragida olingan sof tushum miqdorida jarima solishga sabab bo‘lgan.
Shuningdek, xuddi shunday huquqbuzarlik jarima qo‘llanilganidan keyin bir yil davomida takroran sodir etilgan bo‘lsa:
- realizatsiya amalga oshirilgan oxirgi hisobot choragida olingan sof tushumning 20 foizi miqdorida jarima solishga sabab bo‘lishi belgilandi.
Ilgari bu qoida mavjud emasdi. Qonun rasmiy eʼlon qilingan kundan eʼtiboran kuchga kiradi.
Eslatib o‘tamiz, fevral o‘rtalarida Toshkent shahrida o‘tkazilgan tadbirkorlar bilan uchrashuvda Savdo-sanoat palatasi raisi Davron Vahobov Soliq kodeksining 227 prim 1-moddasida ko‘zda tutilgan jarima miqdori sof tushumning 100 foizidan 2 foiziga kamaytirilishini ma’lum qilgandi. May o‘rtalarida Senatning ellik ikkinchi yalpi majlisida “O‘zbekiston Respublikasi Soliq kodeksining 227-1-moddasiga o‘zgartirish kiritish to‘g‘risida”gi qonun ko‘rib chiqilib, senatorlar tomonidan ma’qullangan edi.
Izoh (0)