Ғазо сектори ғарбида АҚШ томонидан қурилган кўчма порт ишдан чиқиши оқибатида ҳудудга гуманитар ёрдам жўнатиш тўхтаб қолди. Бу ҳақда Al Arabiya нашри хабар берди.
АҚШ расмийлари порт ишдан чиққанини сешанба, 28 май куни тасдиқлаган. Гуманитар юкларни қабул қилишга мўлжалланган, сувда қалқиб турувчи платформа ноқулай об-ҳаво шароити ва сув тошқини келтирган зарар оқибатида ишдан чиққан.
Пентагон вакиллари платформа таъмирлаш учун ўрнатилган жойидан кўчирилганини маълум қилган. Барча жараёнлар якунлангач, у ўз ўрнига қайтарилиши айтилган.
Пентагон матбуот котиби ўринбосари Сабрина Сингх хабар беришича, кўчма платформа таъмирлаш учун Исроилнинг Ашдод бандаргоҳига олиб кетилган. Тўлиқ таъмир учун бир ҳафта вақт кетиши маълум қилинган.
АҚШ ҳарбийлари Ғазодаги кўчма порт қуриш миссиясида фаол иштирок этаётган тўртта ҳарбий кема денгиздаги оғир шарт-шароитлар оқибатида шикастланганини билдирган. Кемаларнинг иккитаси қурилаётган платформа яқинида қуруқликка ўтириб қолган. Яна иккита кема эса Исроилнинг Ашкелон шаҳри соҳиллари томон сузиб кетган.
Кўчма порт қуриш жараёнида уч нафар АҚШ аскари жароҳатланган. Улардан иккитаси енгил жароҳат олиб, қисқа муолажадан сўнг хизматга қайтган. Оғир жароҳат олган бир нафар аскар Исроилдаги касалхонага жўнатилган.
Изоҳ (0)