G‘azo sektori g‘arbida AQSH tomonidan qurilgan ko‘chma port ishdan chiqishi oqibatida hududga gumanitar yordam jo‘natish to‘xtab qoldi. Bu haqda Al Arabiya nashri xabar berdi.
AQSH rasmiylari port ishdan chiqqanini seshanba, 28-may kuni tasdiqlagan. Gumanitar yuklarni qabul qilishga mo‘ljallangan, suvda qalqib turuvchi platforma noqulay ob-havo sharoiti va suv toshqini keltirgan zarar oqibatida ishdan chiqqan.
Pentagon vakillari platforma taʼmirlash uchun o‘rnatilgan joyidan ko‘chirilganini maʼlum qilgan. Barcha jarayonlar yakunlangach, u o‘z o‘rniga qaytarilishi aytilgan.
Pentagon matbuot kotibi o‘rinbosari Sabrina Singx xabar berishicha, ko‘chma platforma taʼmirlash uchun Isroilning Ashdod bandargohiga olib ketilgan. To‘liq taʼmir uchun bir hafta vaqt ketishi maʼlum qilingan.
AQSH harbiylari G‘azodagi ko‘chma port qurish missiyasida faol ishtirok etayotgan to‘rtta harbiy kema dengizdagi og‘ir shart-sharoitlar oqibatida shikastlanganini bildirgan. Kemalarning ikkitasi qurilayotgan platforma yaqinida quruqlikka o‘tirib qolgan. Yana ikkita kema esa Isroilning Ashkelon shahri sohillari tomon suzib ketgan.
Ko‘chma port qurish jarayonida uch nafar AQSH askari jarohatlangan. Ulardan ikkitasi yengil jarohat olib, qisqa muolajadan so‘ng xizmatga qaytgan. Og‘ir jarohat olgan bir nafar askar Isroildagi kasalxonaga jo‘natilgan.
Izoh (0)