Ўзбекистонлик қори Аббосхон Обидов халқаро мусобақада 3-ўринни қўлга киритди. Бу ҳақда Мусулмонлар идораси матбуот хизмати хабар берди.
Қайд этилишича, 25—27 май кунлари Россиянинг Ингушетия минтақасида “Ихва” хайрия жамияти томонидан Қуръони каримни тажвидли ўқиш бўйича II халқаро мусобақа ўтказилган.
Мазкур нуфузли мусобақада мамлакат номидан Ўзбекистон мусулмонлари идораси тасарруфида “Ҳидоя” ўрта махсус ислом билим юрти талабаси Аббосхон қори Обидов муваффақиятли иштирок этган.
Якуний натижаларга кўра ҳамюртимиз Аббосхон қори фахрли 3-ўринга сазовор бўлган.
Эслатиб ўтамиз, 2019 йилда Чеченистоннинг Шали шаҳрида йирик масжиднинг очилиши ва халқаро Қуръон мусобақаси бўлиб ўтганди. Ўшанда ўзбекистонлик қори Нуриддинов Йўлдошбек имом Ҳафснинг имом Осимдан ривояти асосида тиловат қилиб, 100 балдан 98,37 балл тўплаб 7-ўринни эгаллаган эди.
Изоҳ (0)