“Тадбиркорликни ривожлантириш компанияси” 2024 йилда тижорат банклари орқали тадбиркорлик субъектларига тақдим этадиган кафиллик ва компенсация ёрдамлари миқдорлари ҳақида “Дарё”га маълумот берди.
Унга кўра, жорий йилда тадбиркорларга бериладиган кафиллик ёрдамининг энг кам миқдори — 480 миллиард сўмни ташкил этади.
Ушбу маблағларнинг асосий қисми давлатга қарашли банклар, яъни Бизнесни ривожлантириш банки — 61 миллиард сўм, Халқ банки — 57 миллиард сўм, Микрокредитбанк — 55 миллиард сўм, Агробанк ва СҚБ — 53 миллиард сўмдан, Turonbank — 50 миллиард сўм орқали тадбиркорларга йўналтирилади.
Кафиллик берилиши режалаштирилган банкларнинг орасида Ипак Йўли, Kapitalbank ва Гарант Банк энг қуйи ўринларни эгаллаб турибди — ҳар бирида 2 миллиард сўмдан сал кўпроқ.
Фақат кичик тадбиркорлик субъектларига бериладиган компенсация ёрдамининг энг кўп миқдори эса — 150 миллиард сўмдан иборат.
Компенсация ёрдамини кўрсатишда кўмаклашувчи банклар орасида ҳам Бизнесни ривожлантириш банки биринчиликни эгаллаб турибди — 19 миллиард сўм. Халқ банки орқали — 18 миллиард сўм, Микрокредитбанк, Агробанк ва СҚБ орқали — 17 миллиард сўмдан, Turonbank орқали — 15 миллиард сўмдан йўналтирилади.
Энг кам ёрдамни тадбиркорларга етказишда воситачилик қиладиган банклар Ипак Йўли, Kapitalbank ва Гарант Банк ҳисобланади — ҳар бирига 1 миллиард сўмдан камроқ маблағ ажратилиши режа қилинган.
Бунинг натижасида 2024 йилда кафиллик ёрдами билан тадбиркорларнинг 2 триллион сўмдан ортиқ, компенсация кўмаги билан эса қарийб 3,5 триллион сўмлик кредитлари қўллаб-қувватланади.
Тадбиркорлик фаолиятини қўллаб-қувватлаш давлат жамғармаси президент фармони билан 2023 йилда “Тадбиркорликни ривожлантириш компанияси” сифатида қайта ташкил этилганди. Натижада компания томонидан бизнесни қўллаб-қувватлаш бўйича янги инструментлар жорий этилмоқда ва амалдаги ёрдам турлари кенгайтирилмоқда.
Фармон қабул қилингунгача кафиллик фақат кичик тадбиркорларга бериларди. Ҳозирда ўрта бизнес ҳам бундай кафиллик олиши мумкин. Илгари кафиллик фақат миллий валютадаги кредитларга берилган бўлса, эндилик тадбиркорлар хорижий валютадаги кредитлари учун ҳам кафиллик олиши мумкин.
Изоҳ (0)