Ўзбекистонда энди тадбиркорлар хорижий валютадаги кредитлари учун ҳам кафиллик олиши мумкин

Президентнинг “Кичик ва ўрта бизнесни молиявий қўллаб-қувватлаш тизимини такомиллаштириш чора-тадбирлари тўғрисида”ги фармонига кўра Тадбиркорликни қўллаб-қувватлаш давлат жамғармаси “Тадбиркорликни ривожлантириш компанияси” акциядорлик жамияти (компания) сифатида қайта ташкил этилди.

Натижада компания томонидан бизнесни қўллаб-қувватлаш бўйича янги инструментлар жорий этилмоқда ва амалдаги ёрдам турлари кенгайтирилмоқда.

Жумладан, эндиликда компания кичик ва ўрта бизнес тадбиркорлари учун миллий ва хорижий валютада ажратиладиган кредит, лизинг, банк кафолати ҳамда аккредитивларга 500 млн сўмдан 5 млрд сўмгача кафиллик берадиган бўлди.

Бу нима дегани?

Биринчидан, фармон қабул қилингунгача, амалда кафиллик фақат кичик тадбиркорларга бериларди. Энди ўрта бизнес ҳам бундай кафиллик олиши мумкин.

Иккинчидан, илгари кафиллик фақат миллий валютадаги кредитларга берилган. Энди хорижий валютадаги кредитларга ҳам кафиллик берилади.

Учинчидан, бунга қадар кафиллик фақат 2,5 млрд сўмгача тақдим этилган. Эндиликда ушбу миқдор 2 баравар оширилиб, 5 млрд сўмгача этиб белгиланди.

 

Масалан, тўқимачилик соҳасида фаолият олиб бораётган тадбиркор хориждан хом ашё олиш харид қилиш мақсадида 5 млрд сўм эквивалентида хорижий валютада кредит олди. Илгари ушбу кредити учун ҳеч ким унга кафиллик бермас, у албатта гаровга нимадир қўйиши керак эди. Бу ўз-ўзидан тадбиркорга яхшигина қийинчилик туғдирарди. Энди эса президент фармонига кўра, ушбу тадбиркор компаниядан хорижий валютадаги кредити учун кафиллик олиши мумкин. Бу унинг ишини анча енгиллаштиради.

Бугун глобаллашув замонида тадбиркорлар янада кенгайишни, жаҳон бозорига чиқишни истайди. Бундай вазиятда ўз-ўзидан у хорижлик ҳамкасблари билан ҳамкорлик қилади, импорт ёки экспорт шартномалари имзолайди, хорижий валютада олди-берди қилади.

Бундай шароитда хорижий валютадаги кредитлар учун ҳам кафиллик берилишининг йўлга қўйилаётгани тадбиркорларга янги имкониятлар эшикларини очади. Кўплаб муаммоларни ҳал қилишга ёрдам беради.

Кафиллик бериладиган кредит миқдорининг 2 баравар оширилаётгани эса кичик бизнес вакилларини ўрта бизнес даражасига ёки ўрта бизнес вакилларини йирик бизнесга айланишига туртки беради.

Шунингдек, фармонга кўра, яхши ва ундан юқори кредит тарихига эга тадбиркорларга қўшимча кредитлар бўйича такроран кафиллик бериш йўлга қўйилаётгани қувонарли. Бунга қадар тадбиркорга фақат битта кредит учун кафиллик берилар эди.

Бундан ташқари, портфел кафиллиги ҳисобига компаниянинг кафиллигини олиш вақти 7 кунгача қисқаради.