Испания ҳукумати Исроилга қурол-яроғ олиб кетаётган кемани Картахена портига киритишдан бош тортди. Бу ҳақда Испания транспорт вазири Оскар Пуэнте Сантягога таяниб, Euronews хабар берди.
Унинг сўзларига кўра, мазкур ҳаракат Испания ТИВ буйруғига биноан амалга оширилган. Испан ОАВга кўра, кема бортида деярли 27 тонна портловчи моддалар бўлган.
Аввалроқ Испания бош вазири Педро Санчес Мадрид Исроилга қурол сотишни тўхтатганини эълон қилиб, бошқа давлатларни ҳам шундай қилишга чақирган. Санчес Ғазода доимий ўт очишни тўхтатиш ва Фаластинни БМТга тўлақонли аъзо бўлган суверен давлат сифатида халқаро тан олинишини талаб қилишда бошқа дунё етакчиларига қўшилган.
Айни пайтда Исроилнинг Ғазо жанубидаги Рафаҳдаги ҳарбий амалиёти давом этмоқда. Сўнгги кунларда нафақат жанубда, балки Ғазо шимолида ҳам жанглар кучайган.
Аввалроқ Исроил мудофаа вазири Йоав Галлант Рафаҳ ҳудудига қўшимча кучлар юборишини айтган эди. Қўшимча куч юборишдан асосий мақсад операцияни тезроқ якунлаш.
Мен Рафаҳ ҳудудидаман. Қўшинларимиз аъло даражада вазифа бажаряпти. Юзлаб нуқталар аллақачон нишонга олинган. Бўлинмаларимиз ҳудудда манёврлар амалга оширмоқда, — дея таъкидлаган эди исроиллик вазир.
Изоҳ (0)