Қозоғистон Сенати (парламент юқори палатаси) аёллар ҳуқуқлари ва болалар хавфсизлигини ҳимоя қилишни кучайтиришга қаратилган қонунни икки ўқишда маъқуллади. Мажилис (қуйи палата) февраль ойида ушбу қонунни қабул қилган ва энди уни президент Қосим-Жўмарт Тўқаев имзолаши керак.
Қонун уриш ва қасддан баданга енгил шикаст етказганлик учун жиноий жавобгарликни назарда тутади, шунингдек, соғлиққа қасддан ўртача ва оғир шикаст етказганлик учун жазони кучайтиради. Бундан ташқари, вояга етмаганларга нисбатан жисмоний зўравонлик ва шафқатсиз муносабатда бўлиш билан боғлиқ жиноятларда томонларнинг ярашуви эҳтимоли истисно қилинган.
Тузатишлар вояга етмаганларни ўлдириш, зўрлаш ёки жинсий тажовуз учун фақат умрбод қамоқ жазосини назарда тутади, 16 ёшга тўлмаган шахсларни “жинсий алоқага чорлаш” учун жиноий жавобгарликни ўз ичига олади. Ўз жонига қасд қилишга олиб бориш ва бунга ундаганлик учун озодликдан маҳрум қилиш, суицидни тарғиб қилганлик учун эса жарималар назарда тутилган.
Қозоғистонда оиладаги зўравонлик учун жиноий жавобгарликка тортиш қонуни собиқ миллий иқтисодиёт вазири Куандик Бишимбаев рафиқаси Салтанат Нукеновани шафқатсизларча қийноққа солиб ўлдирганликда айбланаётгани юзасидан ўтказилаётган суд жараёни фонида маъқулланди.
Тергов маълумотларига кўра, 2023 йил 9 ноябрга ўтар кечаси Бишимбаев ўз хотинини ресторанда шафқатсизларча калтаклаган, аёл олган жароҳатлари туфайли вафот этган. Бишимбаев эртаси куни ҳибсга олинган. У рафиқаси ўлимида иштирокини рад этиб, Салтанат спиртли ичимлик истеъмол қилганидан кейин тажовузкорлик кўрсатиб, уни жанжал қилишга ундаганини айтган.
11 апрель куни тегишли иш бўйича суд мажлиси бўлиб ўтди, унда собиқ вазирнинг қариндоши Бахитжан Байжанов Бишимбаевнинг хотинини кўкарган ҳолда бир неча бор кўрганини тан олди. Байжанов жиноятни яшириш ва жиноят ҳақида хабар бермасликда айбланган. Унинг кўрсатмаси билан Бишимбаев хотинини ургани акс этган кузатув камераларидаги ёзувларнинг бир қисми ўчирилган.
Изоҳ (0)