Остона суди Қозоғистоннинг собиқ иқтисодиёт вазири Куандик Бишимбаевни 24 йилга озодликдан маҳрум қилди. У рафиқаси Салтанат Нукеновани шафқатсизларча ўлдиришда айбланиб, ҳибсга олинганди.
Жиноятни яширганликда айбланаётган Бишимбаевнинг амакиваччаси Бахитжан Байжанов 4 йил қамоқ жазосига ҳукм қилинди.
Ўзининг сўнгги сўзида Бишимбаэв айбдор эканини, бироқ жиноятни қасддан қилмаганини айтди.
"Ўша оқшом мен ҳеч қачон хотинимнинг ўлимини орзу қилмаганман, мен айбдорман, лекин қасддан қотиллик содир этмаганман", деди у.
2023 йилнинг 8 ноябрь куни кечқурун Бишимбаев “Бау” ресторанида рафиқаси билан жанжаллашиб қолган. Эркак илк бор Салтанат Нукеновани ҳожатхонада, кейин эса лифтдан чиқишда урган. Шундан сўнг, собиқ вазирнинг сўзларига кўра, турмуш ўртоғи рестораннинг VIP кабинасида диванга ётиб ухлаб қолган.
Бишимбаев уни пиджаги билан ёпиб, ёнига ётиб ухлаган. Эртаси куни Бишимбаэв хотинини ётган жойида ташлаб, иш билан ресторандан чиқиб кетган. У 9 ноябрь куни кечқурун Нукенованинг юзи ва танаси совуқ эканлигини пайқагач, тез ёрдам чақирган. Шифокорлар аёлнинг бир кун аввал ўлганини аниқлашган.
Изоҳ (0)