Тиниқ юз териси ва соғлом ичаклар гарови бўлган егуликлар

Диетолог Харли Рианнон Ламберт ичакларни тозалаш ва уларнинг фаолиятини яхшилаш, организмни ёшартириш ҳамда тезроқ озиш учун бирдек фойдали бўлган таомлар ҳақида маълумот берди.

Соғлом вазн ва тиниқ юз терисига эга бўлиш учун парҳез тутишнинг ўзи камлик қилади. Бунинг учун танангиз соғлом бўлиши лозим. Айниқса, иммунитет маркази бўлган ичаклар саломатлиги идеал ҳазм қилиш тизими, чиройли тери ва жилоли сочлар гаровидир.

Қуйида организмни тозалаш ва ёшартиришга улкан ҳисса қўшадиган олти хил таомлар рўйхати билан танишамиз.

Кефир (Қатиқ)

Сутга нисбатан анча фойдалироқ бўлган кефир ичак микрофлораси учун муҳим бўлган пребиотиклар ва фойдали бактерияларни ўз ичига олади. Кефир сигир ёки эчки сутидан тайёрланади ва ошқозонда ферментлар таъсирида содир бўладиган органик моддаларнинг, асосан, углеводларнинг кислородсиз парчаланиш жараёнининг олдини олади.

Эрталаб нонушта қилиш учун вақтингиз бўлмаса, бир стакан кефир нафақат очликни қондиришга ёрдам беради, балки ичакларни ишга туширади.

Йогурт

Йогурт суяк саломатлигини яхшилайди, кайфиятни кўтаради. Аммо йогурт харид қилишдан аввал унинг ёрлиғини ўқиб чиқинг. Кўпгина компаниялар йогурт маҳсулотларини жонли бактерияларсиз ва катта миқдорда шакар билан ишлаб чиқаради. Бундай йогурт эса фойдали ҳисобланмайди.

Соя донлари

Ушбу маҳсулот Японияда жуда машҳур бўлиб, ёпишқоқ ва чўзилувчан бўлади. Оқсилга бой соя донлари японияликларда нонушта учун ҳам, кечки овқатда ҳам истеъмол қилинади.

Мисо шўрваси

Ушбу таом ҳам анъанавий япон ошхонасига мансуб бўлиб, мисо шўрваси юмшатилган мисо пастаси, гуруч, буғдой ва кодзи қўзиқоринларидан тайёрланади. Бундай шўрва оқсил ва ўсимлик толаларининг ажойиб манбаи бўлиб, минерал ва витаминларга бойдир.

Тузланган карам

Тузланган турли навдаги карам иштаҳа очувчи мазали салат бўлибгина қолмай, пребиотиклар, ўсимлик толаси, темир моддаси, C, B ва К витаминларига бой маҳсулотдир. Уйда тузланган карам дўкондагига нисбатан фойдалироқ ҳисобланади.

Кимчи

Корейс ошхонасига мансуб машҳур кимчи таоми турли сабзавотлар, асосан, Хитой карамидан тайёрланадиган аччиқ салатдир. Унинг таркибида овқат ҳазм қилиш тизими учун фойдали бўлган бактериялар, К, B2 витаминлари ва темир моддаси мавжуд.