Qashqadaryo viloyati hokimi Murodjon Azimov hokimlik muassisligidagi gazetalarni rivojlantirish taqdimoti bilan tanishdi. Bu haqda hokimlik axborot xizmati xabar berdi.
Hokim kecha, 15-may kuni Xalq deputatlari Qashqadaryo viloyati kengashi va viloyat hokimligi muassisligidagi “Qashqadaryo” va “Novosti Kashkadari” gazetalari bosh muharriri Kamoliddin Karimovning nashrlar faoliyatining samaradorligi, iqtisodiy imkoniyatlarini kengaytirish va ijodiy yuksalishi uchun amalga oshiriladigan ishlar yuzasidan taqdimoti bilan tanishgan.
2025-yilda tashkil etilganligining 100 yilligini nishonlaydigan “Qashqadaryo” gazetasi bugungi kunda mamlakatimizda amalga oshirilayotgan keng qamrovli islohotlar, viloyat hayoti va xalqaro maydonda ro‘y berayotgan voqealarga oid materiallarni e’lon qilib kelmoqda. Shuningdek, xalq deputatlari viloyati kengashi va viloyat hokimi qarorlariga sharhlar berib borishni ham yo‘lga qo‘ygan.
Taqdimotda tahririyatning yillik daromadini yaxshilash orqali moddiy-texnik bazani yaxshilash, ishchi-xodimlar maoshini oshirish, shuningdek, yuzaga kelgan muammolarni o‘z vaqtida yechish bo‘yicha takliflar tinglandi. Viloyat rahbari taqdimot bilan batafsil tanishib, otaxon gazetani yanada rivojlantirish bo‘yicha o‘z fikrlarini bayon etdi, — deyiladi hokimlikning rasmiy kanalida e’lon qilingan bayonotda.
“Daryo” jurnalistining bu haqdagi savollariga javob bergan Kamoliddin Karimovga ko‘ra, aholisi salkam 3,5 million nafarni tashkil etuvchi viloyatning otaxon nashri ayni kunda 2594 tirajda chop etilmoqda.
-OKBnFdfR.jpg)
“Novosti Kashkadari” gazetamiz to‘liq elektron variantga o‘tkazilgan. Biroq kadr masalasi sabab yurgizish qiyin kechmoqda. Yaxshi kadrlarga ehtiyoj bor, ammo ularni qoniqtiradigan oylik berish imkoniyatimiz yo‘q, hozircha. Shu bois ayni paytda 10 nafar “Qashqadaryo” fidoyisi gazeta uchun jonbozlik qilib, ishlab turibdi. Hokimga takliflar bildirildi, natija bo‘lishidan umidvormiz, — deydi viloyat hokimi bilan uchrashgan gazeta mas’uli.
Bosh muharrirning aniqlashtirishicha, hozirda gazetada o‘rtacha oylik ish haqi 2 million 600 ming so‘mni tashkil qiladi.
Xodimlarga ko‘proq ijod qilib, ko‘proq gonorar ishlab olish imkoniyati yaratilgan. Demak, faollik ko‘rsatgan xodimda ko‘p pul topish imkoni bor. Gazetaning bitta soni uchun 2 million so‘m gonorar belgilangan. Oyda 4-5 ta son chiqaramiz, xodim uddalasa, hammasini olsin. Qolaversa, gazetaga chop etilmay, faqat saytga qo‘yiladigan materiallar uchun ham gonorar to‘lanadi, — deydi Kamoliddin Karimov.
-PGJgsdfU.jpg)
Murodjon Azimovning matbuot kotibi Ahror Sodiqovning bildirishicha, hokim gazetaning moddiy texnik bazasini yangilash, obuna targ‘ibotini kuchaytirish kerakligini aytgan.
Ko‘pchilik tashkilotlar odatda matbuot tarqatuvchilar orqali obuna bo‘lib, soxta kvitansiyalar olib, o‘rtada obuna uchun deyilgan pulning yo‘q bo‘lib qolish holatlari kuzatilar edi. Shu sabab gazeta obunasini O‘zbekiston pochtasi orqali tashkil etish rejalashtirilmoqda. Muhimi obuna uchun deyilgan pullar tahririyatga yetib borsin, — dedi Ahror Sodiqov.
Izoh (0)