Хитойнинг Hunan Industrial Equipment Installation компанияси М41 Бишкек—Душанбе—Термиз автомобиль йўлига параллель йўналишда 171 километр узунликка эга бўлган пуллик йўл қуришга катта қизиқиш билдирмоқда. Бу ҳақда Сурхондарё вилояти ҳокимлиги матбуот хизмати хабар берди.
Маълумотларга кўра, Хитой компанияси йўлсозликда 66 йиллик бой тажрибага эга бўлиб, ўтган йилларда 40 минг километрдан ортиқ узунликдаги юқори сифатли пуллик йўл бунёд этган.
Сурхондарё вилоят ҳокими Улуғбек Қосимов йирик компания вакилларини қабул қилиб, замонавий пуллик автомагистрал йўл қурилиш лойиҳаси билан танишган. Қурилишнинг экологик ва иқтисодий жиҳатларига эътибор қаратиб, турар жойлар ва дов-дарахтлар кўчирилишини энг паст даражага тушириш, лойиҳанинг табиатга таъсирини имкон қадар камайтириш масалаларини муҳокама этган.
ЎзАнинг ёзишича, айни пайтда М41 Бишкек—Душанбе—Термиз автомобиль йўли ўрнида пуллик йўл қуриш лойиҳаси ҳам мавжуд. Бироқ лойиҳани амалга ошириш учун мингдан ортиқ уй-жой, 60 мингдан зиёд дарахтни кўчириш зарур бўлади. Бу молиявий ва қатор экологик масалаларни ўртага ташлаши мумкин. Шунинг учун мазкур йўлга муқобил экологик ва молиявий таъсири кам йўлни қуриш кўзда тутилмоқда.
Музокара якунида тажрибали мутахассисларни жалб этган ҳолда лойиҳани такомиллаштириб, мукаммал қайта ишлаб чиқиш юзасидан ҳамкорликни давом эттиришга келишилди, — дейилади хабарда.
Ўзбекистондаги илк пуллик йўлларнинг қурилиши ҳақида 2018 йилда хабар берилганди. Ўшанда бу каби йўлларнинг биринчисини қуриш билан Германиянинг GP Günter Papenburg компанияси шуғулланиши мумкинлиги айтилганди. 2019 йилда Автомобиль йўллари қўмитаси Ўзбекистондаги илк пуллик трассани қуриш учун жой танланаётганини маълум қилганди.
2023 йилда Туркиянинг Cengiz Holding компанияси Ўзбекистонда пуллик автомобиль йўлларини қуриш лойиҳаларида иштирок этишга қизиқиш билдирди.
Изоҳ (0)