Чехия Словакия билан икки давлат вазирлар маҳкамаларининг навбатдаги қўшма йиғилишини Россия ва Украинага нисбатан муносабатларидаги келишмовчиликлар туфайли бекор қилди. Бу ҳақда BBC хабар берди.
Маълум қилинишича, бундай учрашувлар мунтазам равишда ўтказиб турилади ва унинг бекор қилиниши ўта яқин муносабатларга эга бўлган икки давлат учун жуда ноодатий ҳолдир. Можаро Словакия ташқи ишлар вазири Юрай Бланарнинг Анталиядаги дипломатик саммит доирасида Россия ташқи ишлар вазири Сергей Лавров билан учрашганидан кейин юзага келган.
Словакия қўшниси томонидан ушбу музокаралар сабабли қаттиқ танқид остига олинган. Словакия бош вазири Роберт Фико мамлакат эркин ташқи сиёсат олиб борувчи ва “дунёнинг тўрт бурчаги билан” ўзаро алоқада бўлган суверен давлат эканини айтган.
Чехия ва Словакиянинг Россияга нисбатан сиёсати ҳамда Украинани қўллаб-қувватлаши ҳозир деярли диаметрал қарама-қаршидир, — дейди Кемерон.
Словакия бош вазири Роберт Фико яқинда Россияга ҳамдардлигини яна бир бор таъкидлади ва уруш “Украина неонацистларининг тажовузлари” туфайли 2014 йилда бошланганини айтди. Унинг фикрича, бу конфликтнинг ҳарбий ечими йўқ ва вазиятни тинч йўл билан ҳал қилиш йўлларини излаш зарур.
Чехия учун Украинадаги урушни тинч йўл билан тартибга солиш Россия қўшинларининг у ердан тўлиқ олиб чиқилишини англатади. Чехия Украина учун зудлик билан 800 минг снаряд сотиб олиш ташаббуси билан чиқмоқда ва доимий равишда Украинани барча зарур қуроллар билан таъминлашга чақирмоқда. Чехия Буюк Британия ва Польшадан олдин Украинага танклар етказиб берган биринчи давлат эди.
Ўз навбатида, Европанинг етакчи ўқ-дори ишлаб чиқарувчи Chexoslovak Group Украинада қўшма корхоналар ташкил этиш режасини эълон қилди. Компаниянинг миллиардер эгаси Михал Стрнад Украина мудофаа қобилиятини мустаҳкамлаш учун артиллерия ўқ-дориларини ишлаб чиқаришга урғу берилишини айтди.
Изоҳ (0)