Ўзбекистонда ишлаб чиқарилаётган автомашиналар эҳтиёт қисмларининг 70-75 фоизини маҳаллийлаштириш режалаштирилган. Бу ҳақда “Ўзавтосаноат” АЖ бошқаруви раиси ўринбосари Даврон Ҳидоятов Тошкент шаҳрида бўлиб ўтган III Халқаро инвестиция форуми якунлари бўйича “Дарё” мухбирига берган қисқача интервьюсида маълум қилди.
Даврон Ҳидоятовнинг айтишича, “Ўзавтосаноат” АЖ инвесторлар учун ҳамиша очиқ ва асосан чет эллик компаниялар билан ишлаб келмоқда.
Ҳозир маҳаллийлаштиришни 50 фоиздан оширганмиз. Бу чегара эмас. Муҳтарам президентимиз автомобиль нархларини арзонлаштириш бўйича топшириқ берган. Нархни қачон арзонлаштирамиз? Қачонки эҳтиёт қисмларини ишлаб чиқаришни маҳаллийлаштирсак. Бунинг даражасини 50 фоиз эмас, 70-75 фоизга олиб чиқишимиз керак. Бу бўйича ҳозирги кунда инвесторлар билан музокаралар ўтказилмоқда, — деди “Ўзавтосаноат” АЖ вакили.
Унинг айтишича, “Ўзавтосаноат” III Халқаро инвестиция форумида умумий қиймати 25 миллион долларлик маҳаллийлаштириш бўйича тўртта лойиҳа келишилган.
Бунда бир қатор автомашиналарнинг эҳтиёт қисмларини ишлаб чиқариш кўзда тутилган. Яъни Хитой ва Япония билан биттадан ва Жанубий Корея билан иккита шартнома имзоладик, — деди Даврон Ҳидоятов.
Таъкидланишича, форум давомида “Ўзавтосаноат” АЖ эксперт бўйича ҳам умумий қиймати 45 миллион долларлик шартнома имзолаган.
Изоҳ (0)