Афғонистон шимолидаги Бағлон вилоятида 10 май куни кучли сув тошқинлари оқибатида 50 киши ҳалок бўлган. Бу ҳақда Al Jazeera нашри хабар берди.
Расмийлар вилоят аҳолининг кучли сув тошқинларига тайёр бўлмаганини билдирган. Ҳодиса оқибатида қурбонлар сони ошиши мумкинлиги хабар қилинган.
Ички ишлар вазирлиги матбуот котиби Абдул Матин Қане кучли ёмғирдан кейин Бағлоннинг бешдан ортиқ туманида сув тошқини содир бўлганини айтган. Айни дамда фуқароларнинг кўпчилиги тошқин ҳудудида қолиб кетгани хабар қилинган.
“Ички ишлар вазирлиги ҳудудга гуруҳлар ва вертолётлар юборди, бироқ вертолётларда тунги кўриш чироқлари етишмаслиги туфайли операция муваффақиятли бўлмаслиги мумкин”, — дейилган расмий хабарда.
Қурбонлар сонини вилоят табиий офатларни бошқариш бошқармаси бошлиғи, маҳаллий расмий Ҳидоятуллоҳ Ҳамдард ҳам тасдиқлаган. Ҳодиса оқибатида қурбонлар сони яна ортиши мумкинлиги айтилган.
Расмийларга кўра, апрель ойининг ўрталаридан бери Афғонистоннинг 10 вилоятида тўфон ва бошқа сув тошқинлари 100 га яқин одамнинг ҳаётига зомин бўлган. Табиий офат мамлакатнинг бутун ҳудудига таъсир этган.
Изоҳ (0)