Сурхондарё вилоятининг Шеробод туманида кучли сел оқибатида 360 бош қўй нобуд бўлди. Бу ҳақда Экология, атроф-муҳитни муҳофаза қилиш ва иқлим ўзгариши бошқармаси хабар берди.
Ижтимоий тармоқларда бир гала қўйлар жасади юк машинасидан чуқурликка тўкиб кетилаётгани акс этган видеолар тарқалганди.
Расмийларнинг маълум қилишича, 29—30 апрель ва 1 май кунлари ёғингарчилик кўп бўлиши оқибатида Шеробод туманининг “Боғиобод” маҳалласи ҳудудига кучли сел келган. Маҳалладаги қишлоққа адирликдан келган кучли сел қўрадаги 360 бош қўйни нобуд қилган.
-YO-2m-nQ.jpg)
Қайд этилишича, ушбу ҳудуд вилоят Фавқулодда вазиятлар бошқармаси, вилоят Санитария-эпидемиология бошқармаси томонидан назоратга олиниб, нобуд бўлган қўйлардан ҳар хил касалликлар тарқамаслиги учун дезинфекция қилиниб кўмилди.
“Ўзгидромет” сел-сув тошқинлари хавфи ҳақида мунтазам огоҳлантириб келади. 9—11 май кунлари ҳам республиканинг қуйидаги тоғолди ва тоғли ҳудудларида, шу жумладан Сурхондарё вилоятининг Шеробод туманида сел-сув тошқини юзага келиши мумкин.
Изоҳ (0)