Ғазо аҳолиси ҲАМАСнинг тинчликка эришиш йўлидаги қарорини нишонлаш учун кўчаларга чиқди

ҲАМАС 6 май куни ўт очишни тўхтатиш таклифига рози бўлиши ортидан Ғазо аҳолиси кўчаларда байрам уюштиришни бошлади. Бу ҳақда Al Jazeera хабар берди.

Хабарга кўра, ҳозирда Рафаҳда минглаб фаластинликлар кўчаларга тўпланишган. Улар ҲАМАС билан бирдам эканликларини билдиришган.

Al Jazeera нашрининг сиёсий таҳлилчиси Марван Бишаранинг айтишича, ҲАМАСнинг сўнгги баёноти етти ойлик урушда янги саҳифани очди. Ушбу қарор Исроил учун кутилмаган вазиятда эълон қилингани айтилган.

“ҲАМАС томонидан воситачиларнинг ўт очишни тўхтатиш бўйича таклифига ижобий муносабат билдирилиши барчани ҳайратда қолдирди. Айниқса, АҚШ ва Исроил буни умуман кутмаган эди”, — деган Марван Бишара.

Манбага кўра, ўт очишни тўхтатиш таклифи ва унга тўлиқ эришиш 3 босқични қамраб олади. Бу уч босқич Миср ва Қатар расмийлари ҲАМАСга таклиф қилган ва Исроил талабларига ҳам мос келадиган тарзда амалга оширилади.

Исроил Ғазонинг шимоли ва жанубини ажратиб турадиган Нетзарим коридорини тарк этиши орқали биринчи босқич сулҳ музокаралари бошланиши айтилган. Иккинчи босқич ҳарбий ва душманлик операцияларини бутунлай тўхтатишни ва Исроил кучларини Ғазодан тўлиқ олиб чиқиб кетишни назарда тутади. Учинчи босқичда Ғазо блокадасининг тугатилиши режаси илгари сурилади.