Тошкентда Усмон мусҳафи реставрация қилинади

Тошкентда Усмон мусҳафи қадимий қўлёзмасини консервация ва реставрация қилинади. Бу ҳақда Саида Мирзиёева маълум қилди.

“Ушбу эзгу ишга ўз ҳиссасини қўшадиган барчага миннатдорлик изҳор этаман. Биргаликда биз муқаддас қўлёзмани келажак авлод учун сақлаб қола оламиз”, — дейди президенти ёрдамчиси.

Унинг билдиришича, ЮНЕСКО “Жаҳон хотираси” рўйхатига киритилган Усмон мусҳафи (Тошкент Қуръони) қадимий қўлёзмаси президент топшириғига кўра консервация ва реставрация қилинади.

Маданият ва санъатни ривожлантириш жамғармасининг маълум қилишича, Усмон мусҳафи Қуръони каримнинг бугунги кунгача сақланиб қолган энг қадимий қўлёзмаси ҳисобланади. VII асрда ҳижоз хатида ёзилган бўлиб, ҳозирда Ўзбекистон мусулмонлари идораси музей кутубхонасида сақланади. 1997 йилда ЮНЕСКО уни “Жаҳон хотираси” рўйхатига киритган.

Мазкур муқаддас китобни консервация ва реставрация қилиш лойиҳаси хорижлик мутахассислар, жумладан Кембриж университетидан Кристин Роз, франциялик реставраторлар Акселя Дело ва Корали Барб, шунингдек, Истанбул қўлёзмалар устахонаси ва архив бўлими мудири Нил Байдар иштирок этмоқда.

Улар ҳар бир саҳифани синчиклаб кўздан кечириб, босқичма-босқич таъмирлаш режасини ишлаб чиқади ҳамда келгусида муҳофаза қилиш бўйича тавсияларни беради. 

Бу иш Ўзбекистон Маданият ва санъатни ривожлантириш жамғармаси ҳамда Ўзбекистон мусулмонлари идорасининг қўллаб-қувватлови ва назорати остида амалга оширилмоқда.