Тошкентда «Мўйи Муборак» музейидаги «Усмон Мусҳафи» сақланаётган саркофагнинг — ҳавони тозалаб, намликни бир меъёрда таъминлаб турувчи ускунанинг хизмат қилиш муддати тугагани туфайли 5—6 август кунлари янгисига алмаштирилди.
Алмаштириш жараёнида Ўзбекистон мусулмонлари идораси раиси ўринбосари шайх Абдулазиз Мансур, Дин ишлари бўйича қўмита бош мутахассиси Маъмур Толибов, биология фанлари номзоди Аҳмаджон Махсумхонов, Германиядан келган мутахассис Майер Себастиан ва бошқалар иштирок этди.
«Усмон Мусҳафи» сақланаётган саркофагга ўрнатиш учун олинган РК-2/5 русумли ускунани Ўзбекистон мусулмонлари идораси ва Германиянинг Гласбау Ҳаҳн фирмаси ўртасида тузилган шартномага мувофиқ, германиялик мутахассис ўзи билан олиб келиб, ўрнатди.
Майер Себастиан 6 август куни янги ўрнатилган РК-2/5 русумли ускунани ишлаш жараёнини назорат қилди. Ускуна талаб даражасида ишлаётганига амин бўлганидан сўнг Мушафнинг сақланишида масъул бўлган кишиларга ускуна ишлаш жараёнидаги талабларни тушунтириб, уларга ускунани ишлатиш йўриқномасини топширди.
Германиялик мутахассис Гласбау Ҳаҳн фирмаси талабига мувофиқ саркофагнинг хизмат қилиш муддати тугаган эски РК-2 русумли ускунасини ўзи билан олиб кетди.
Изоҳ (0)