Ўзбекистон Олимпия терма жамоаси эртага, 3 май куни U23 Осиё кубогининг финал учрашувида Японияга қарши баҳс олиб боради.
Мазкур беллашув олдидан Темур Кападзе Суперлига 6-туридан ўрин олган “Динамо”га қарши беллашувни қолдиришни сўради. Терма жамоа аъзолари 4 май куни тонгда Тошкентга етиб келади.
“Лига термамизнинг эҳтимолий финалда тўп суришини инобатга олиб, “Олимпик” иштирокидаги беллашувни турнинг энг сўнгги куни — 7 майга белгилаган эди. Шундай бўлса-да, мавжуд ҳолат инобатга олиниб, Лига Кападзенинг таклифини бу сафар ҳам қаноатлантиришга қарор қилди.
Шунингдек, 7 май кунги 1 та ўйин қолдирилганидан келиб чиқиб, ўша учрашув учун режалаштирилган техника билан “Пахтакор” — “Металлург” учрашуви ўтказилиши юзасидан келишилди. Яъни, Пахтакор иштирокидаги ўйин 6 май санасидан 7 майга кўчирилди”,— дейили ПФЛ матбуот хизмати берган хабарда.
Маълумот учун, U23 Ўзбекистон терма жамоасининг Осиё кубогига жўнаб кетиши олдидан Суперлига 5-туридан ўрин олган уч учрашув: Насаф — Навбаҳор, Нефтчи — Пахтакор, Металлург — Олимпик беллашувлари ҳам қолдирилган эди.
Эндиликда қолдирилган беллашувлар сони 4 тани ташкил этмоқда. ПФЛ матбуот хизмати ушбу учрашувлар қачон ўтказилиши ҳақида кейинроқ маълум қилинишини айтди.
Изоҳ (0)