O‘zbekiston Olimpiya terma jamoasi ertaga, 3-may kuni U23 Osiyo kubogining final uchrashuvida Yaponiyaga qarshi bahs olib boradi.
Mazkur bellashuv oldidan Temur Kapadze Superliga 6-turidan o‘rin olgan “Dinamo”ga qarshi bellashuvni qoldirishni so‘radi. Terma jamoa a’zolari 4-may kuni tongda Toshkentga yetib keladi.
“Liga termamizning ehtimoliy finalda to‘p surishini inobatga olib, “Olimpik” ishtirokidagi bellashuvni turning eng so‘nggi kuni — 7-mayga belgilagan edi. Shunday bo‘lsa-da, mavjud holat inobatga olinib, Liga Kapadzening taklifini bu safar ham qanoatlantirishga qaror qildi.
Shuningdek, 7-may kungi 1 ta o‘yin qoldirilganidan kelib chiqib, o‘sha uchrashuv uchun rejalashtirilgan texnika bilan “Paxtakor” — “Metallurg” uchrashuvi o‘tkazilishi yuzasidan kelishildi. Ya’ni, Paxtakor ishtirokidagi o‘yin 6-may sanasidan 7-mayga ko‘chirildi”,— deyili PFL matbuot xizmati bergan xabarda.
Ma’lumot uchun, U23 O‘zbekiston terma jamoasining Osiyo kubogiga jo‘nab ketishi oldidan Superliga 5-turidan o‘rin olgan uch uchrashuv: Nasaf — Navbahor, Neftchi — Paxtakor, Metallurg — Olimpik bellashuvlari ham qoldirilgan edi.
Endilikda qoldirilgan bellashuvlar soni 4 tani tashkil etmoqda. PFL matbuot xizmati ushbu uchrashuvlar qachon o‘tkazilishi haqida keyinroq ma’lum qilinishini aytdi.
Izoh (0)