Rossiya kuchlari 30-aprel kuni Ukraina janubidagi Odessa port shahriga ballistik raketalar bilan hujum qilishi oqibatida 3 nafar tinch aholi vakillari halok bo‘lgan. Bu haqda The Kyiv Independent nashri xabar berdi.
Talafotlar haqida dastlab Odessa gubernatori Oleh Kiper xabar bergan. Uch kishi halok bo‘lgani, shuningdek, yana 3 fuqaro jarohatlangani aytilgan.
Rasmiylar qurbonlarning shaxsi haqida hech qanday maʼlumot bermagan. Jarohatlanganlarga tibbiy yordam ko‘rsatilayotgani aytilgan.
Ukraina harbiy havo kuchlari 30-aprelga o‘tar kechasi Odessada havo hujumi bo‘lishi to‘g‘risida bir qator ogohlantirishlar eʼlon qilgan. Aholidan xavfsizlik choralari ko‘rish so‘ralgan.
29-aprel kuni ham Rossiya raketalari Odessaga hujum qilishi oqibatida besh nafar fuqaro halok bo‘lgani xabar qilingan edi. Shuningdek, hujumda kamida 30 kishi jarohatlangani eʼlon qilingan.
Rossiya 2024-yilning bahorida Ukrainaning turar joy va fuqarolik infratuzilmasiga qarshi hujumlarni kuchaytirgani xabar qilingan edi. Hujumlar asosan mamlakat janubi va janubi-sharqiy mintaqalariga qaratilgan.
Ukraina harbiy havo kuchlari matbuot kotibi Illiya Yevlash so‘nggi raketa hujumi haqida qisqacha bayonot eʼlon qilgan. Unga ko‘ra, Rossiya Odessaga uchta “Iskender-M” ballistik raketasi bilan hujum qilgan.
Dushman Odessa shahrini asosiy nishon sifatida tanladi. U Odessaning aholi zich joylashgan hududlariga uchta “Iskander-M” ballistik raketasi bilan hujum qildi, odamlarni o‘ldirdi va yarador qildi, — degan Illiya Yevlash.
Izoh (0)