Германия иқтисодиёт вазири ва вице-канцлер Роберт Хабек ZDF телеканалидаги дастурида энергия инқирози пайтида атом электр станцияларини ёпиш тўғри қарор бўлганини, чунки уларни сақлаб қолиш Россияга энергия қарамликнинг давом этишига сабаб бўлишини таъкидлади. Маълумот учун, Россия ураннинг асосий етказиб берувчиси ҳисобланади.
“Атом энергетикаси бизни Россияга қарамликдан ҳимоя қилади, деган аргумент, афсуски, нотўғри”, — деди Хабек.
Вице-канцлер, шунингдек, Европа Иттифоқи ва АҚШ Россия уранини сотиб олишни тақиқловчи санкциялар пакетини қабул қилиш зарурлигини таъкидлади.
2011 йилда ўша пайтдаги канцлер Ангела Меркель бошчилигидаги Германия ҳукумати 2022 йилгача атом энергиясидан бутунлай воз кечишга қарор қилди. Бу қарорга келинишига асосий сабаблардан бири Япониянинг Фукусима атом электр станциясидаги авария бўлди.
2022 йилга келиб Германияда фақат учта атом электр станцияси ишлаётган эди: Isar 2, Neckarwеstheim 2 ва Emsland. Россия газидан воз кечилгани сабабли уларнинг фаолияти 2023 йил апрель ойи ўрталарига қадар узайтирилди, шундан сўнг уларнинг фаолияти бутунлай тўхтатилди.
Изоҳ (0)