“Бозорлар ва савдо комплексларини замонавий ёндашувлар асосида тартибга келтиришнинг қўшимча чора-тадбирлари тўғрисида”ги Вазирлар Маҳкамаси қарори лойиҳаси муҳокамага қўйилди.
Қарор лойиҳасида Солиқ қўмитаси томонидан бозорлар ва савдо комплекслари фаолиятини назорат ва мониторинг қилиш учун “E-bozor” электрон автоматлаштирилган ахборот тизимини жорий қилиш мўлжалланмоқда. Бозорлар ва савдо комплекслари устав капиталида маҳаллий давлат ҳокимияти органларининг иштироки мажбурий экани билан боғлиқ талабни бекор қилган ҳолда уларни босқичма-босқич хусусийлаштириш кўзда тутилган.
Шунингдек, давлат муассасаси ва давлат иштирокидаги корхоналарнинг бозорлар ва савдо комплекслари устав капиталидаги акция пакетларини (улушларини) кейинчалик яхлит пакет сифатида оммавий савдолар орқали сотиш ёки самарали фойдаланишни ташкил этиш мақсадида маҳаллий давлат ҳокимияти органларига ўтказилади, бунда:
- акция пакетларини (улушларини) маҳаллий давлат ҳокимияти органларига ўтказиш шартлари ва механизмлари Давлат активларини хусусийлаштириш ва хусусийлаштириш жараёнларини мувофиқлаштириш бўйича давлат комиссияси томонидан белгиланади;
- тугатилган давлат муассасаси ва давлат иштирокидаги корхоналарга тегишли акция пакетлари (улушлари) маҳаллий давлат ҳокимияти органларининг бир томонлама топшириқларига асосан битимларни рўйхатга олиш талабини қўлламаган ҳолда ва Қимматли қоғозларнинг марказий депозитарийси томонидан хизмат ҳақи ундирилмасдан амалга оширилади;
- бозорлар ва савдо комплексларининг акция пакетлари (улушлари) маҳаллий давлат ҳокимияти органларига ўз вақтида ўтказилишини таъминлашни назорат қилиш Давлат активларини бошқариш агентлиги зиммасига юкланади.
Қуйидагилар тасдиқланади:
- ҳудудларда жойлашган бозорлар ва савдо комплексларини замонавий ёндашувлар асосида тартибга келтириш бўйича амалга ошириладиган чора-тадбирлар дастури;
- Қорақалпоғистон Республикаси Вазирлар Кенгаши раиси, вилоятлар ва Тошкент шаҳар ҳокимлари бошчилигида бозорлар ва савдо комплекслари фаолиятини ўрганиш ва таклифларни тайёрлаш бўйича тузиладиган ишчи гуруҳ намунавий таркиби;
- ҳудудларда қишлоқ хўжалигига мўлжалланмаган ер участкаларида ташкил этиладиган янги деҳқон бозорлари, мавжуд бозорлар ва савдо комплекслари, шунингдек, уларнинг филиаллари негизида ташкил этиладиган “эко-бозорлар” ҳамда қишлоқ хўжалигига мўлжалланмаган ер участкаларида ташкил этиладиган йирик савдо-кўнгилочар марказлари рўйхатлари;
- дастлабки босқичда устав капиталидаги давлат акция пакетлари (улушлари) замонавий кўринишга келтириш шарти билан белгиланган тартибда сотиладиган 26 та бозор ва савдо комплекси рўйхати.
Ишчи гуруҳ томонидан хатлов натижаларига кўра, ҳар бир бозорлар ва савдо комплекслари кесимида уларнинг кейинги фаолиятини самарали ташкил этиш, хусусийлаштириш, шу жумладан, хусусий секторга ўтказиш шартлари ва механизмлари, давлат-хусусий шерикликка бериш бўйича асослантирилган таклифларни ишлаб чиқиш ва Вазирлар Маҳкамасига киритиш кўзда тутилган.
Январь бошларида Тошкент шаҳар ҳокимлиги пойтахтдаги озиқ-овқат, деҳқон ва буюм бозорларида қурилиш ва реконструкция ишлари бошланаётганини эълон қилганди. Бу орқали озиқ-овқат, деҳқон ва буюм бозорларидаги сотувчи ва харидорларга қулайлик яратиш, бозорлар фаолиятини такомиллаштириш, уларнинг санитария-гигиена ҳамда ёнғин хавфсизлиги талабларига жавоб берадиган ҳолатга келтириш мақсад қилинган.
Изоҳ (0)