Инсульт — мияда қон айланишининг ўткир бузилиши бўлиб қон қуюқлашиши ҳисобига пайдо бўлган тромблар натижасида мияда қон айланишининг бузилишидир. Касаллик ўлим кўрсаткичи бўйича юрак-томир ва онкологик касалликлардан сўнг учинчи ўринни эгаллайди. Инсульт ҳақида гап кетганда кўпчилик нутқнинг бузилиши ва тананинг бир қисми ишламай қолиши ёки оғиз атрофидаги мушакларнинг чўкишини кўз олдига келтиради.
Буюк Британия соғлиқни сақлаш хизмати маълумотларига кўра, инсон ҳаёт учун ўта хавфли бўлган ушбу касалликнинг бошқа белгилари ҳам кўп ва улардан бири овқатланиш пайтида намоён бўлиши мумкин. Статистик маълумотларга кўра, сўнгги 5 йил ичида қон айланишининг бузилиши билан оғриган беморларнинг учдан бир қисми 50 ёшгача бўлганлардир.
Дисфагия — ютишда қийналиш ва томоқда бирор нарса тиқилиб қолгандек ҳис қилиш ҳам инсультнинг илк аломатларидан бири ҳисобланади. Бунда бемор нормал овқатлана олмайди, сув ичишда ҳам қийналади ва умуман олганда озуқа қизилўнгачдан ўтиши мушкул бўлади. Дисфагиянинг муҳим жиҳатларидан бири — бу қаттиқ озуқага нисбатан суюқликнинг томоқдан ўтиши қийинроқ бўлиши. Ушбу белгини эътиборсиз қолдириш мумкин эмас.
Шунингдек, ейилган овқатнинг ошқозонга етиб бормай баъзан бурундан ҳам қайтиб келиши, сабабсиз йўтал ва овоз тембрининг ўзгариши кабилар инсульт аломатлари бўлиши мумкин.
Изоҳ (0)