Польша НАТОнинг ядро қуролини Nuclear Sharing дастури доирасида ҳудудига жойлаштиришга тайёр. Бу ҳақда Польша президенти Анжей Дуда Fakt газетасига берган интервьюсида маълум қилди.
“Агар иттифоқчиларимиз НАТОнинг шарқий қаноти хавфсизлигини мустаҳкамлаш мақсадида ҳудудимизда ядро қуролини жойлаштиришга қарор қилган бўлса, биз бунга тайёрмиз. Шимолий Атлантика альянси иттифоқчисимиз ва бу борада мажбуриятларга эгамиз, яъни умумий сиёсат олиб борамиз”, — деди Дуда.
Польша президенти бу масала Вашингтон ва Варшава ўртасидаги музокаралар мавзуси эканини билдирди.
“Мен бир неча бор бу ҳақда гапирганман . Тан олишим керакки, мендан бу ҳақда сўрашганида, тайёрлигимизни билдирдим”, — дея таъкидлади у.
Дуданинг сўзларига кўра, Россия Калининград вилоятини ҳарбий жиҳатдан мустаҳкамлашда давом этмоқда, шунингдек, Беларусь ҳудудида ядро қуролини ҳам жойлаштирган.
Кремль муносабати
Кремль матбуот котиби Дмитрий Песков Польшанинг Америка ядровий қуролларини ҳудудига жойлаштиришига жавоб чоралари кўрилишини айтди.
“Агар бу амалга ошса, ҳарбийлар, албатта, вазиятни таҳлил қилади. Ўйлайманки, ҳар қандай ҳолатда ҳам улар бизнинг хавфсизлигимизни кафолатлаш учун барча зарур жавоб чораларини кўради”, — деди Кремль матбуот котиби.
НАТОнинг Nuclear Sharing дастури ядровий қуролларга эга бўлмаган альянс мамлакатларига АҚШ қуролларини жойлаштириш имконини беради. Европа ва Туркияда 100 та тактик ядро қуроли мавжуд. B61-3 ва B61-4 бомбалари учун 0,3 дан 50 килотонгача бўлган зарядлар Бельгия, Германия, Италия, Нидерландия ва Туркиядаги олтита базада сақланади.
Изоҳ (0)