Польша президенти Анжей Дуда Россия 2026 йилдаёқ НАТОга ҳужум қилиши мумкинлигини айтди. У бу ҳақда CNBC’га берган интервьюсида маълум қилди.
Дуданинг сўзларига кўра, мазкур прогнозни немис мутахассислари томонидан тузилган ҳисоботлардан бирида ўқиган.
“Янги ҳисоботлар келяпти ва яқинда немис мутахассислари томонидан тузилган бирини кўрдим, унда айтилишича, эҳтимол, 2026 ёки 2027 йилда Путин ўз иқтисодини ҳарбий ҳолатга олиб, шундай ҳарбий кучга эга бўладики, у НАТОга ҳужум қила олади”, — деди у.
Польша президентига кўра, Ғарб 2026 йилгача Европа хавфсизлигини максимал даражада ошириши, жумладан, ўқ-дорилар ва қурол-яроғ захираларини кўпайтириши керак. У Россия ва НАТО ўртасида ҳарбий ҳаракатлар бошланишига йўл қўймаслик учун шундай қилиш кераклигини таъкидлади.
2024 йил январида НАТО ҳарбий қўмитаси раҳбари Роб Bauer альянс кучлари яқин йигирма йил ичида Россия билан кенг кўламли урушга тайёргарлик кўраётганини айтганди. Шундан сўнг бир қатор Европа давлатлари Россиянинг НАТО давлатларига ҳужум қилишини истисно қилмасликларини айтди.
Шу билан бирга, АҚШ Миллий разведкасининг март ойидаги ҳисоботида таъкидланишича, Россия АҚШ ва НАТОнинг бошқа давлатлари билан тўғридан тўғри ҳарбий тўқнашувни истамайди. Март ойида альянс бош котиби Йенс Столтенберг НАТО ҳозирда ўз мамлакатларига Россиядан таҳдид кўрмаётганини айтганди.
Изоҳ (0)