Навоий ва Тошкент вилоятларида газдан ноқонуний фойдаланганлар давлатга 400 млн сўмдан зиёд зарар етказди

Навоий ва Тошкент вилоятларида газдан ноқонуний фойдаланганлар 400 миллион сўмдан зиёд зарар етказди, деб хабар бермоқда Прокуратура департаменти. 

Унга кўра, ҳолат Бош прокуратура ҳузуридаги Департаментнинг Навоий вилояти Навбаҳор тумани бўлими ҳамда ИИБ ва газ таъминоти бўлими ходимлари билан ҳамкорликда ўтказилган тезкор тадбирда аниқланган. “М-Р.” МЧЖ масъул шахслари МЧЖ нотурар биносини умумий фойдаланишдаги газ тармоғига тўғридан тўғри улаб, жами 155,1 миллион сўмлик табиий газдан ноқонуний фойдалангани аниқланган.

Шу каби, департаментнинг Бекобод ва Оҳангарон шаҳар бўлимлари томонидан ўтказилган терговга қадар текширувларда фуқаролар Т.Х. ва Ж.А. ўз уйларида ташкил этган иссиқхоналарда ясама иситиш қозонларини газ тармоғига тўғридан тўғри улаб, жами 248,4 миллион сўмлик табиий газдан ноқонуний фойдаланганликлари аниқланган.

Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.