Польшада Украина президенти Владимир Зеленскийга суиқасд уюштиришда гумонланган шахс қўлга олинди. Бу ҳақда Варшава прокуратурасига таяниб, Deutsche Welle хабар берди.
Гумонланувчи Польша фуқароси Павел К. Россия ҳарбий разведкасига маълумот узатишда ва “Россия махсус кучларига Зеленскийга эҳтимолий суиқасдни режалаштиришда ёрдам берганликда” айбланмоқда.
“У Россия ҳарбий разведка хизматлари номидан ҳаракат қилишга тайёрлигини билдирган ва Украинадаги урушда бевосита иштирок этган Россия фуқаролари билан алоқада бўлган”, — дейди Польша терговчилари.
Польша расмийлари эркакнинг фаолияти тўғрисида украиналик ҳамкасбларидан маълумот олган, бу уларга “муҳим далиллар” тўплаш имконини берган.
Украина Хавфсизлик хизматига кўра, гумондор Россия армияси билан ҳамкорлик қилган ва Жешув-Ясенка аэропортидаги хавфсизлик бўйича тўпланган маълумотларни узатган.
“Бу маълумотлар Россияга Польша ҳудудида Зеленскийга эҳтимолий суиқасдни режалаштиришда ёрдам бериши керак эди”, — дейилади хабарда.
Украина Бош прокуратураси ҳибсга олинган шахс “ўз ташаббуси билан” Россия разведкасига алоқага чиққанини таъкидлади.
Изоҳ (0)