Polshada Ukraina prezidenti Vladimir Zelenskiyga suiqasd uyushtirishda gumonlangan shaxs qo‘lga olindi. Bu haqda Varshava prokuraturasiga tayanib, Deutsche Welle xabar berdi.
Gumonlanuvchi Polsha fuqarosi Pavel K. Rossiya harbiy razvedkasiga maʼlumot uzatishda va “Rossiya maxsus kuchlariga Zelenskiyga ehtimoliy suiqasdni rejalashtirishda yordam berganlikda” ayblanmoqda.
“U Rossiya harbiy razvedka xizmatlari nomidan harakat qilishga tayyorligini bildirgan va Ukrainadagi urushda bevosita ishtirok etgan Rossiya fuqarolari bilan aloqada bo‘lgan”, — deydi Polsha tergovchilari.
Polsha rasmiylari erkakning faoliyati to‘g‘risida ukrainalik hamkasblaridan ma’lumot olgan, bu ularga “muhim dalillar” to‘plash imkonini bergan.
Ukraina Xavfsizlik xizmatiga ko‘ra, gumondor Rossiya armiyasi bilan hamkorlik qilgan va Jeshuv-Yasenka aeroportidagi xavfsizlik bo‘yicha to‘plangan ma’lumotlarni uzatgan.
“Bu ma’lumotlar Rossiyaga Polsha hududida Zelenskiyga ehtimoliy suiqasdni rejalashtirishda yordam berishi kerak edi”, — deyiladi xabarda.
Ukraina Bosh prokuraturasi hibsga olingan shaxs “o‘z tashabbusi bilan” Rossiya razvedkasiga aloqaga chiqqanini ta’kidladi.
Izoh (0)