Ўзбекистон элчихонасида Буюк Британияда хориждан юқори малакали шифокорлар ва ҳамшираларни иш билан таъминлашга ихтисослашган Triple West Medical рекрутинг компанияси директори Гурол Махмут билан учрашув ўтказилди. Бу ҳақда “Дунё” АА хабар берди.
Маълум қилинишича, суҳбат давомида Британия томонига Ўзбекистон Ҳукумати томонидан меҳнат миграцияси соҳасида олиб борилаётган ишлар, хорижда ишлаётган ватандошларнинг ҳуқуқ ва манфаатларини ҳимоя қилиш қаратилган давлат дастурлари ҳақида батафсил маълумот берилган. Меҳнат муҳожирларига касб ва тил ўргатиш мақсадида ташкил этилган ўқув ҳамда “Ишга марҳамат” мономарказлар фаолияти таъкидланган.
Британия томони Ўзбекистон ҳукуматининг мамлакат фуқароларини чет элга тартибли ва хавфсиз ишга жойлаштириш бўйича амалга ошираётган тизимли ишларини юқори баҳолаган.
“Ўзбекистондан олий тоифадаги шифокорларни ишга жалб қилиш учун ўзаро ҳамкорликни йўлга қўйиш ва улар учун касбий тил кўникмаларини эгаллашлари учун ўқувларни ташкил этишга тайёрмиз. Танловдан ўтган шифокорлар Британиядаги нуфузли шифохоналарда иш билан таъминланадилар”, – деган Гурол Махмут.
Музокаралар якунида Triple West Medical рекрутинг компанияси вакилларидан иборат делегациянинг Ўзбекистонга амалий сафарини уюштириш ва тегишли давлат идоралари вакиллари билан музокаралар ташкил этишга келишиб олинган.
Изоҳ (0)