Ўзбекистонлик шифокорлар ва ҳамширалар малакасини ошириш орқали Кувайт шифохоналарига ишлаш учун жалб қилиниши кутилмоқда. Бу ҳақда “Дунё” АА хабар берди.
Ўзбекистон элчихонасида Кувайтнинг Adan Hospital клиникаси шифокори, йирик сармоядор Муҳаммад Ҳасан ал-Кандари билан учрашув ўтказилиб, унда тиббиёт соҳасида икки томонлама ҳамкорлик истиқболлари ҳамда амалга оширилган ва оширилиши кўзда тутилган лойиҳалар муҳокама этилди.
Томонлар Ўзбекистонда ёш болаларда кўз ва юрак бўйича жарроҳлик амалиётларини амалга ошириш имкониятлари хусусида фикр алмашди.
Кувайт вакили, шунингдек, Ўзбекистонда Training center тиббиёт ўқув марказини очиш таклифини билдирди. Таъкидланишича, марказ ўзбекистонлик шифокорлар ва ҳамшираларни малакасини ошириш орқали Кувайт шифохоналарига ишлаш учун жалб қилинади.
Музокаралар якунида мазкур масалани батафсил муҳокама қилиш мақсадида Ўзбекистоннинг тегишли ташкилотлари билан онлайн учрашув ташкил қилиш тўғрисида келишиб олинди.
Изоҳ (0)