Ўзбекистонда 2024 йил апрель ойида пенсия тўловларини нақдсиз шаклда олувчиларга маблағлар тўлиқ (100 фоиз) молиялаштирилгани маълум қилинди.
Хабар берилишича, Пенсия жамғармаси томонидан жорий йилнинг апрель ойи тўлов рўйхатларига киритилган 4 миллион нафар пенсия олувчилар учун талаб этилган маблағлар тижорат банкларига молиялаштирилиб берилди.
Ўз навбатида пенсия тўловларини нақд пулсиз шаклда олувчи 3,1 миллион нафар (ёки жами олувчиларнинг 77 фоизи) фуқароларнинг банк карталарига маблағлар тўлиқ юклаб берилиши таъминланди.
Амалдаги қонунчилик талабларига мувофиқ пенсия пулларини нақд шаклда олувчиларга жорий ой тўловлари тасдиқланган графикларга асосан “Халқ банки”нинг сайёр кассалари томонидан етказиб берилиши маълум қилинди.
Март ойидаги пенсиялар
Жорий йилнинг март ойи тўлов рўйхатларига киритилган 4 миллион нафар пенсия олувчилар учун талаб этилган маблағлар 5 март кунига қадар тижорат банкларига тўлиқ молиялаштириб берилди. Ўз навбатида, пенсия тўловларини нақд пулсиз шаклда олувчи 3,1 миллион нафар (ёки жами олувчиларнинг 77 фоизи) фуқароларнинг банк карталарига маблағлар тўлиқ юклаб берилиши таъминланди.
Аввалроқ 2024 йил 1 январда республикада пенсия олувчиларнинг умумий сони 3 миллион 930 минг 400 нафарга етгани, бу аҳолининг 10,7 фоизини ташкил этиши хабар қилинган. Пенсия жамғармаси давлат пенсияларининг барча турлари учун йиллик 53,5 триллион сўм тўламоқда. Бунда бир ойлик ўртача харажатлар миқдори қарийб 4,5 триллион сўмни ташкил этади.
Эслатиб ўтамиз, жорий йил январига қадар жамғарма тасарруфида нафақалар тўлови ҳам бор эди. 2023 йил 1 июндаги президент фармонига мувофиқ, 2024 йил 1 январдан бошлаб қатор ижтимоий тўловлар Ижтимоий ҳимоя миллий агентлиги тасарруфига ўтказилди.
Бунда ижтимоий тўловлар учун ариза бериш, уларни кўриб чиқиш, тайинлаш ва тўлашнинг амалдаги тартиби сақлаб қолинади. Эндиликда фуқаролар мазкур ижтимоий тўловлар билан боғлиқ барча саволларига туман ёки шаҳарлардаги “Инсон” ижтимоий хизматлар марказларига мурожаат қилишлари мумкин.
Маълумот учун, “2024 йил учун Ўзбекистон Республикасининг давлат бюджети тўғрисида”ги қонунда жорий йилги иш ҳақи, пенсиялар, стипендиялар ва нафақалар миқдорини, шунингдек, айрим хизматлар турлари бўйича тарифларни ошириш билан боғлиқ харажатлар учун қўшимча 9,5 триллион сўм ажратилиши белгиланган. Хусусан, 2024 йилда Пенсия жамғармасига 16 триллион сўм маблағ йўналтирилади.
Изоҳ (0)