Тошкентда йиғлаган болага қўл кўтарган тарбиячи ишдан олинди

Болалар омбудсмани ижтимоий тармоқларда боғчада тарбиячи кичик ёшдаги болага нисбатан қўпол муомала қилаётгани акс этган видеога муносабат билдирди.

Ўрганиш ишлари давомида аниқланишича, 27 март куни Юнусобод тумани мактабгача таълим ташкилоти тарбияланувчиси С.Х.нинг онаси Н.Х. гуруҳ тарбиячиси томонидан вояга етмаган фарзандига қўполлик қилгани тўғрисида Юнусобод тумани мактабгача ва мактаб таълими бўлимига мурожаат қилган.

Мурожаатда Н.Х. тарбиячи С.И. кундузги машғулот вақтида фарзанди йиғлагани учун болага қўпол муносабатда бўлиб, унга қўл кўтаргани, бунинг натижасида фарзандининг қўлида кўкаришлар борлигини билдирган.

Юнусобод тумани мактабгача ва мактаб таълими бўлими ҳолатни ўрганиш давомида тарбиячи ҳақиқатдан ҳам болага нисбатан ниҳоятда қўпол, педагог учун хос бўлмаган муносабатда бўлгани аниқланган.

Мазкур мактабгача таълим муассасаси маъмурияти томонидан бундай номақбул ҳолатларга йўл қўймаслик зарурати таъкидланиб, 29 март куни тарбиячи С.И. га нисбатан интизомий чора кўрилган ва тарбиячи билан тузилган меҳнат шартномаси бекор қилинган.

Ҳозирда ҳолат Юнусобод тумани прокуратураси томонидан ўрганилмоқда.

Февраль ўрталарида Тошкент вилояти Чирчиқ шаҳридаги боғчада тарбиячи болани уриб, ҳожатхонага қамаб қўйгани учун ишдан олинган эди.