Toshkent viloyatidagi xususiy bog‘chada bolani urib, hojatxonaga qamab qo‘ygan tarbiyachi ishdan olindi

Toshkent viloyati Chirchiq shahridagi bog‘chada tarbiyachi bolani urib, hojatxonaga qamab qo‘ygani aks etgan video ijtimoiy tarmoqlarda tarqaldi. Bolalar ombudsmani holat nazoratga olinganini ma’lum qildi.

Aniqlanishicha, voqea Chirchiq shahridagi xususiy maktabgacha ta’lim muassasasida 8-fevral kuni sodir bo‘lgan. Bog‘cha tarbiyachisi oilaviy sabablarga ko‘ra asabiy holatda bo‘lganligi tufayli tushlik paytida uxlay olmay yig‘layotgan bolaga bir necha bor qattiq baqirib, so‘ng bolani urib hojatxonaga qamab qo‘ygan.

Hozirda mazkur tarbiyachi Mehnat kodeksining 161-moddasining 5-bandi (xodimning o‘z mehnat majburiyatlarini bir marta qo‘pol ravishda buzganligi uchun mehnat shartnomasini bekor qilish) asosida lavozimidan ozod etilgan.

Holat yuzasidan tuman IIB tomonidan tergovga qadar tekshiruv olib borilmoqda va tarbiyachining harakatiga huquqiy baho berilmoqda.

“Tarbiyachi tomonidan bu tarzdagi jazo usulini qo‘llanilishi bolaning manfaatlariga mutlaqo ziddir. Bolaning ruhiy-emotsional sog‘lig‘iga, sha’ni va qadr-qimmatiga putur yetkazuvchi bunday harakatlar javobsiz qolishi mumkin emas!”, — deyiladi xabarda.

Bolalar ombudsmani mazkur fakt bo‘yicha bolaning qonuniy manfaatlarini ta’minlash yuzasidan o‘z kuzatuvini qat’iy davom ettirishini qo‘shimcha qildi.