Дунёдаги энг кекса одам ҳисобланган Венесуэла фуқароси Хуан Висенте Перес Мора салкам 115 ёшида вафот этди. Бу ҳақда мамлакат президенти Николас Мадуро маълум қилди.
“Дунёнинг энг кекса одами сифатида Гиннеснинг рекордлар китобига киритилган Хуан Висенте Перес Мора 114 ёшида вафот этди. Унинг оиласини қучоқлаб, Эл-Кобре шаҳрининг барча аҳолисига ҳамдардлик билдираман”, — деб ёзди Мадуро.
El Nasional газетасига кўра, Перес Мора 114 ёш-у 339 кунлигида нафас олиш тизимидаги асоратлар туфайли 115 ёшга тўлишидан бир оз олдин вафот этди. У 2022 йил 112 ёшида вафот этган испаниялик Сатурнино де ла Фуэнте Гарсияни ортда қолдириб, 112 ёш-у 253 кунлик ёши билан Гиннеснинг рекордлар китобига дунёнинг энг кекса одами сифатида киритилганди.
Перес Мора ўзининг узоқ умр кўришини “доимий иш, яхши дам олиш, эрта уйқу ва кундалик бир стакан бренди” билан изоҳлаган. Шу билан бирга, у яхши овқатланган, ибодат қилган, сув ичган ва эрта уйқуга ётган.
Изоҳ (0)