АҚШ Исроилни ёрдам ходимларини ҳимоя қилишга чақиришда давом этади — Пентагон

Пентагон АҚШнинг Исроилни ёрдам ходимларини ҳимоя қилишга чақиришда давом этишини маълум қилди, дея Anadolu хабар берди.

Биз уларни бегуноҳ фаластинликларни, ёрдам ходимларини ҳимоя қилишга чақиришда давом этамиз, — деди Пентагон матбуот котиби Сабрина Сингҳ журналистларга.

Унинг сўзлари Ғазо секторида Исроил зарбаси натижасида World Central Kitchen (WCК)нинг етти нафар ходими ҳалок бўлганидан бир кун ўтиб янгради. Қурбонлар Австралия, Польша, Буюк Британия ва Фаластин фуқаролари, шунингдек, АҚШ ва Канаданинг икки фуқаролигига эга шахслар бўлган.

Исроил ҳарбийлари “фожиали” ҳодисанинг тафсилотларини аниқлаш учун чуқур текширув ўтказаётганини айтган. 

Ғазодаги фаластинликларга инсонийлик ёрдами кўрсатаётган ходимлар ўлими учун масъулиятни исроилликлар ўз зиммаларига олишди. Улар тергов олиб бормоқда, — деди Сингҳ.

Исроил октябрь ойидан бери Ғазо секторига ҳалокатли ҳарбий ҳужум уюштирмоқда. Ўшандан бери кенг кўламли вайронагарчилик ва озиқ-овқат тақчиллиги туфайли 32 900 дан ортиқ фаластинлик ҳалок бўлган, 75 494 киши жароҳатланган. Исроил Ғазода қаттиқ блокада ўрнатган, бунинг натижасида аҳоли, айниқса, Ғазонинг шимолий қисми очарчилик ёқасига келиб қолган.

БМТ маълумотларига кўра, Исроил босқини оқибатида озиқ-овқат, тоза сув ва дори-дармонларнинг кескин тақчиллиги туфайли Ғазо аҳолисининг 85 фоизи уйларини тарк этган ва анклав инфратузилмасининг 60 фоизи вайрон қилинган.

Ўтган ҳафта Исроилдан Ғазо секторида очарчиликнинг олдини олиш учун кўпроқ ҳаракат қилишни сўраган Халқаро суд (ICJ) Исроилни геноцидда айблади.