Xiaomi корпорацияси Хитойда ўзининг биринчи электромобили SU7 ни сотишни бошлади. Бу ҳақда компания бош директори Лей Сзюн тақдимотига таяниб, Bloomberg хабар берди.
Хабарга кўра, Xiaomi SU7 Хитойнинг 29 шаҳрида сотилади, етказиб бериш апрель ойи охирида бошланади. Стандарт SU7 седан 100 км/соат тезликка 5,28 сонияда эришади. У 73,6 кВт/соат қувватга эга BYD Blade аккумуляторида ишлайди ва 700 км масофани босиб ўтади.
Мазкур автомобиль 2023 йил охирида тақдим этилган. 12 март куни корпорация SU7 сотуви бошланганини эълон қилганида, Xiaomi’нинг Гонконгдаги акциялари 12 фоизга қимматлашган. Инвесторлар Xiaomi компаниясининг ўз бизнесини хилма-хил қилиш қарорига ижобий муносабат билдирган.
Xiaomi’дан ташқари, Apple ҳам электромобиллар бозорига киришни режалаштирган эди. Бироқ февраль ойида Америка компанияси ўзининг электромобилини яратиш лойиҳасини якунлаши маълум бўлди. Лей Сзюн тақдимот чоғида Apple компаниясининг кетишини кутмаганини ва Xiaomi Америка компанияси қурилмаларини қўллаб-қувватлашини айтган.
Bloomberg Intelligence таҳлилчилари SU7 нинг ўртача нархи 220 000–260 000 юан (тахминан 30 700–36 200 доллар) бўлиши мумкинлигини тахмин қилган.
Лей Сзюн SU7 нинг “500 000 юангача бўлган энг яхши кўринишдаги, энг яхши бошқарувчи ва энг ақлли седан” бўлишини исташини айтган. У SU7 Tesla Model S ва Porsche Taycan Turbo электромобиллари билан рақобат қилиши кераклигини таъкидлаган.
Изоҳ (0)