Хитойда Xiaomi компанияси билан ҳамкорликда иш олиб борувчи Huami бренди бир марта қувватланиш орқали 45 кунгача ишлай оладиган Amazfit Т-Rex 2 «ақлли» соатини тақдим этди, деб хабар беради GizmoChina.
Amazfit Т-Rex 2 модели 2020 йилда тақдим этилган ўзидан олдинги версиянинг мустаҳкамлиги ва ўзига хос дизайнини сақлаб қолган. Смарт-соатларга оғирлиги 66,5 граммга тенг 1,39 дюймли AMOLED-экран ўрнатилган ва у 15 та ҳарбий сертификатга эга. Улардан Цельсий бўйича -30 даража совуқда ҳам фойдаланиш мумкин.
Қурилма зангламайдиган пўлатдан ишланган тўртта металл тугма билан жиҳозланган. Сув ўтказмайдиган корпуси ажойиб даражада — унинг ёрдамида 100 метр чуқурликкача тушиш мумкин. Нам юқтирмайдиган тасмаси антибактериал силикон материалдан ишланган.
Смарт-соатларда компас, барометр ва 150 та, жумладан, алпинизм, чанғи учиш ва балиқ овлаш каби спорт режимлари мавжуд. Девайс беш турдаги — Beidou, GPS, GLONASS, Galileo ва QZSS — глобал сунъий йўлдош тизимларини қўллаб-қувватлайди.
Қопқоғи остидан сиғими 500 мА/соатга тенг батарея ўрин олган бўлиб, унинг ёрдамида соат 24 кунгача оддий режимда ишлай олади. Энергия тежаморлик режимига ўтилганда эса ушбу муддат 45 кунгача ошиши ёки интенсив фойдаланилганда 10 кунгача тушиши мумкин.
Amazfit Т-Rex 2 тўрт хил рангда 31 майдан Хитойда сотувга чиқади.
Аввалроқ Poco компанияси ўзининг биринчи «ақлли» соати ва геймерлар учун Buds Pro наушникларини тақдим этгани тўғрисида хабар берилганди.
Изоҳ (0)