Тошкент шаҳрида радиоэлектрон воситалардан тегишли рухсатномалар расмийлаштирмасдан фойдаланган шахс аниқланди. Бу ҳақда “Ўзкомназорат” матбуот хизмати хабар берди.
Маълум қилинишича, “Ўзкомназорат” инспекцияси ҳамда Электромагнит мослашув хизмати ходимлари томонидан Тошкент шаҳри ҳудудида радиомониторинг тадбирлари ўтказилган. Унда Мирзо Улуғбек тумани Асака кўчасида жойлашган қурилиш объектида фуқаро Ғ.М. томонидан 2 та радиоэлектрон воситалардан (рация) тегишли рухсатномалар расмийлаштирмасдан фойдаланиб келинаётганлиги аниқланди.
Бу билан фуқаро томонидан радиоэлектрон воситалар ёки юқори частотали қурилмалардан фойдаланишнинг белгиланган қоидалари ҳамда давлат стандартлари, нормалари ва белгиланган тартибда ўрнатилган параметрлари талаблари бузилган.
Ушбу фуқарога нисбатан МЖтКнинг 152-моддаси 1-қисмига (радиоэлектрон воситалар ёки юқори частотали қурилмаларни лойиҳалаш, қуриш (ўрнатиш) ва улардан фойдаланишнинг белгиланган қоидаларини, радиоайирбошлаш ва радиочастоталардан фойдаланиш қоидаларини бузиш, радионурланишнинг техник регламентлари ёки давлат стандартлари, нормалари ва белгиланган тартибда ўрнатилган параметрларига риоя этмаслик) асосан жазо чораси қўлланилди.
Изоҳ (0)