1939-yilda suratga olingan “Oz mamlakatiga sayohat” filmida aktrisa Judi Garlend kiygan qizil tufli Heritage Auctions kim oshdi savdosiga qo‘yildi. Bu haqda “Pravila jizni” nashri xabar bermoqda.
Manbaga ko‘ra, poyabzalning narxi 3,5 million dollarni tashkil etadi. U Gollivud liboslari dizayneri Gilbert Adrian tomonidan ishlab chiqilgan.
Kim oshdi savdosiga qo‘yilishidan avval, yaltiroq munchoqlar bilan bezatilgan poyabzal Los-Anjeles, Nyu York, London va Tokiodagi bir nechta ko‘rgazmalarda namoyish etilishi rejalashtirilgan. Tuflining turli davlatlarga “sayohati” joriy yilning dekabr oyiga qadar davom etadi.
Doroti nomli poyabzal qimmatbaho artefaktdir. U Gollivud filmlari tarixidagi eng muhim rekvizit sanaladi, — dedi Heritage Auctions kompaniyasining vitse-prezidenti Jo Maddalena.
Hozirda mazkur qimmatbaho tufli kolleksiyachi Maykl Shouga tegishli. 2005-yilda poyabzalni Minnesota shtatidagi Judi Garlend muzeyiga vaqtinchalik berib turgan. Biroq uzoq vaqt o‘tmay tufli muzeydan o‘g‘irlab ketilgan.
Poyabzal o‘g‘risi Terri Jon Martin bo‘lib chiqdi. Aynan u muzey oynasini bolg‘a bilan urib sindirgan. O‘g‘ri poyabzallarni munchoqlar bilan emas, balki haqiqiy rubinlar bilan bezatilgan deb o‘ylagan. Jinoyatchi tez fursatda topildi va u qilmishini tan oldi. Advokatining so‘zlariga ko‘ra, u “Oz mamlakatiga sayohat” filmini hech qachon ko‘rmagan va poyabzalning madaniy ahamiyati haqida ham bexabar bo‘lgan.
Filmda mazkur tufli yordamida qahramon Kanzasdagi uyiga qayta olar edi. Buning uchun Doroti uning poshnasini yerga uch marta urishi va “Uydan yaxshiroq joy yo‘q” iborasini takrorlashi kerak edi.
Izoh (0)