Мерилин туфлиси, Beatles кроссовкаси: Машҳур инсонлар шарафига номланган гардероб элементлари (фото)

Мода уйлари ва брендлар кўпинча ўз маҳсулотларини машҳур инсонларнинг номи билан аташади, бунинг учун улар билан ҳамкорлик қилиш шарт эмас, баъзи дизайнерлар ўтган йиллардаги услублардан илҳомланиб бу нарсаларни яратган.

Кейт Миддлтон номи билан аталган оқ блузка

Кейт Миддлтон — кийиниш борасидаги нафис ва ажойиб танлови билан кўплаб аёлларнинг қалбидан жой олган. Кембриж герсогиняси америкалик ва британиялик дизайнерларнинг оддий услубдаги кийимларини кийишни афзал кўради ва оммавий ишлаб чиқарилган машҳур бренд либосларини кийишдан уялмайди. Баъзи брендлар қироллик севгисига миннатдорчилик сифатида кийимларини монархлар номи билан аташади. Британиянинг Whistles бренди блузка ишлаб чиқарди ва уни Кейт деб номлади. Бу Миддлтон оқ Whistles блузкасини кийган ҳолда унаштирув маросимига келганидан кейин содир бўлди. Кўп ўтмай дўкон пештахталарида герсогиня номи билан аталган худди шу моделдаги блузка пайдо бўлди. Блузка чегараланган миқдорда ишлаб чиқарилган.

Кейт Миддлтоннинг образлари нафақат журналистлар, балки дизайнерларнинг ҳам эътиборидан четда қолмайди. У чиқишларининг бирида MaxMara классик ёқаси бор оқ кашмир палтосида намоён бўлгач, бренд кийим моделини қайтадан чиқарди ва уни герсогиня шарафига номлади.

Мода музейи кўргазмалар бўлими бошлиғи Полина Уханованинг сўзларига кўра, биринчи бўлиб дизайнерлар ва моделерлар қироллик оила аъзолари, уларнинг севимлилари ва аристократия вакиллари ҳамкорлик қилган. Биринчи мода маҳсулоти XVII асрнинг “флоранж” бантиги бўлиб, Луи XIV нинг севгилиси Анжелик де Флоранж номи билан аталган.

Бриджит Бардо бардоткаси

Дизайнерлар ўз ижодларини фақатгина қироллик оила аъзоларига бағишламади. Тор, қаттиқ матодан ишланган блузка актриса Брижит Бардо шарафига — бардотка деб аталган. У фильмлардан бирида шу блузкада намоён бўлди ва кийим тезда машҳур бўлди. Кийим француз дизайнери Жан-Поль Готье томонидан яратилган. У блузкаларнинг бир нечта турларини ишлаб чиқди. Дизайнер томонидан ўйлаб топилган бардотка саҳнадаги чиқишлар учун мўлжалланган бўлиб, уни кечки тадбирларга ҳам кийиш мумкин. Бугунги кунда бардотка блузкаси замонавий модага қараб кийинувчи аёллар гардеробининг ажралмас қисмига айланди ва Dolce & Gabana модалар уйи каби дизайнерлар орасида энг севимли кийимдан бирига айланди.

Блейк Лайвли номига қўйилган пойабзал

Кўпгина модани кузатувчи аёллар гардеробларида Кристиан Лубутен пойабзали бўлишини орзу қилади. Агар ҳаракат қилсангиз, бу истак амалга ошиши мумкин. Бироқ элита пойабзал дизайнери ўзининг энг яхши ижод намуналаридан бирини кимнингдир номига қўйганини мақташ умуман бошқа масала. Америкалик актриса Блейк Лайвли ҳам бор. Голливуд модаистининг коллекциясида 300 га яқин пойабзал бор, улардан 40 таси лубутен ҳисобланади.

Блейк ёзда Парижда “Ғийбатчи қиз” фильмининг суратга олиш жараёнларида дизайнернинг иш жойига экскурсияга боради. У актрисага ўша пайтда яратаётган оёқ кийим моделини кўрсатди. Оёқ кийимларнинг гўзаллигидан ҳайратда қолган актриса дизайнерга оёқ кийимларини ёстиғи остига қўйиб ухлашга тайёрлигини айтди ва кутилмаган жавобни олди.

“Мен уларни сизнинг шарафингизга номлайман”, — деб айтади ва 2010 йилда Кристиан Лубутен The Blake деб номланган босоножкалар моделини чиқарди. У турли рангдаги камар ва ингичка шпилкалардан ташкил топган.

Мерилин туфлиси

ХХ асрнинг энг машҳур актрисаларидан бири Мерилин Монро ҳам кўплаб замонавий дизайнерлар учун илҳомлантирувчи ҳисобланади. 2012 йилда Фрателли Россетти италян пойабзал бренди Мерилин Монро шарафига туфли яратди ва уларни Ладй Брера деб номлади. Туфли классик Брера лоаферснинг бироз ўзгартирилган модели бўлиб, учли ва пошнали тузилишга эга. Пойабзалнинг ёрқин қизил ранги Мерилиннинг севимли лаб бўёғининг рангини эслатади ва ушбу моделни ишлаб чиқариш учун асосий материалга айланган тимсоҳ териси пойабзал номига қараганда камроқ эътиборни тортади.

Қиролича учун ажойиб пойабзал

Леди Гаганинг ғайриоддий услуби ва ўзгачалиги бир вақтнинг ўзида иккита таниқли рассом учун илҳом манбаи бўлди — Брайан Этвуд ва Кристиан Лубутин ўзларининг пойабзалларини хонандага бағишлади. Дизайнер Брайан Этвуднинг Фаме қора чармдан ишланган, пошналари олтин рангли пойабзали 2012 йилда тақдим этилди ва бир вақтнинг ўзида хонанда томонидан чиқарилган худди шу номдаги парфюм шишасига ўхшарди. Хонандага 23 см баландликдаги пошнали ва оғир платформа шунчалик ёқдики, у тез-тез омма олдида бу оёқ кийим билан кўриниш берди.

Яна бир дизайнер Кристиан Лубутин Леди Гага учун пойабзал яратди. Юпқа пошнали теридан ишланган пойабзал хонанда афзал кўрган баланд платформадан қолишмади. Оёқ кийим шу қадар машҳур бўлдики, дизайнер моделга турли хил безак ва рангларни қўшишга қарор қилди.

Beatles гуруҳининг қўшиғи номи билан аталган кроссовка

Мусиқа саноати вакиллари кўпинча ўз номи билан аталган коллекцияларнинг эгалари бўлади. Американинг Ванс спорт пойабзаллари бренди Beatles аъзолари билан биргаликда 2014 йилда гуруҳнинг шу номдаги қўшиғига бағишланган Yellow Submarine кроссовкалари коллекциясини яратди. Бу ғоя компания рассомларига 1968 йилда чиққан “Сариқ сув ости кемаси” мултфильмини томоша қилгандан кейин келган. Коллекция гуруҳ аъзоларининг анимацион портретлари ва мултфильмнинг турли саҳналари акс эттирилган тўрт жуфт классик кроссовкадан иборат.

Birkin ва Kelli сумкалари

Энг афсонавий ва орзулардаги аксессуарлардан бири, Hermes мода уйининг сумкалари ўз номларини тарихда қолдирди. Сумканинг номи модада из қолдирган аёллар шарафига қўйилган.

Birkin сумкаси ғояси француз актрисаси Жейн Биркинга тегишли. Ҳермер модалар уйи директори 1984 йилда актриса билан бир самолётда учган. Актриса суҳбат давомида ҳамёнида ички бўлимлар йўқлигидан шикоят қилди, кенг ва яхши моделдаги сумкага эга бўлиш ажойиблигини айтди. Жейн Биркин номини олган машҳур Hermes сумкаси ғояси пайдо бўлганда, самолётдаги суҳбат мода саноатини тубдан ўзгартирди. Бу бузоқ терисидан тайёрланган модел бўлиб, унинг стандарт ўлчамлари 35, 40 ва 45 сантиметрни ташкил этади. Сумканинг лаконик дизайни кичик олтин ёки платина қисқичдан, шунингдек, маҳсулотнинг астаридаги компания брендидан ташқари ҳеч қандай безаклардан иборат эмас.

Kelli сумкаси ўзининг машҳур “синглиси”дан анча олдин, ХIX асрнинг 90 йилларида ишлаб чиқарилган ва “Sac à dépêches” деб номланган. Сумка 1956 йилда, Монако маликаси Грэйс Keлли туфайли машҳурликка эришди. Унинг фотосуратлари Life журналининг муқовасида чоп этилди ва сумкани энг қиммат аксессуарлардан бирига айлантирди. Худди шу йили Hermes модалар уйи сумканинг моделини ўзгартирди ва унга расмий Kelli номини берди. Сумка трапезоидал шаклга эга ва битта тутқичдан иборат, бироқ уни елкага тақса ҳам бўлади. Бугунги кунда мазкур моделнинг турли хил ранг ва ўлчамдаги варианлари мавжуд.

Биринчи хоним учун сумка

Hermes’нинг Kelli сумкаси сингари Gucci томонидан яратилган Jakcie O сумкаси дастлаб машҳур инсон учун ишлаб чиқарилмаган, бироқ сумка модели эгаси туфайли бутун дунёга машҳур бўлган номни олди. 1947 йилда Gucci бамбук тутқичли ва чармдан тикилган аёллар аксессуари Icоn елкага тақиладиган сумкасини чиқарди. Кейинчалик сумка модели Американинг биринчи хоними Жаклин Кеннеди Онассис номини олди.

Жеки 60 йилларда кўпинча севимли сумкаси билан тадбирларда кўриниш берди. Gucci сумка моделининг муваффақияти ортидан, сумканинг номи ўзгартирилиб, у энг машҳур эгаси Жеки номи билан аталди. Кенг сумка кесилган пирамидага ўхшайди, Ҳ шаклидаги катта қисқичга эга ва калта тасмадан иборат. 2009 йилда Gucci моделни янгилади, бренд ўртача ва катта ўлчамда, турфа рангдаги сумкаларни ўз ичига олган янги New Jakckie О аксессуарлар коллекциясини чиқарди.